|
Prosa seglalata
Bravo don pietro !
di Giuliana Pambianchi
Segnalata VI Concorso 2004
Don Pietròn era el pret d'la Brombolona,
'na parocchia sa 'na chies e 'na ventina de chès tel
mont sopra Canavacc.
Don Pietròn era gros e alt (è per quest,
che invec de chiamal Don Pietre, la gent el chiamava
"Don Pietròn"); quant era giovin era stat t'i bersaglier
e 'i era 'rmast l'abitudin de caminè svelt svelt, guèsi
de corsa.
Era brav sa i su' parochien e 'i aiuteva
com podeva, anca se i temp erne duri e la miseria era
nera. C'aveva p'rò un difett, che anca lo stess
arcnosceva, e 'i rincresceva 'na gran mucchia da essa da
s'mo', mo en li fèva propi a fanne a men: i piaceva un
bel po' el vin.
Quant 'niva gió tel paes a chiapè la
corriera per gì a Urbin, prima d'arrivè ma la fermèta
aveva da passè davanti a dó osterì: quella de Galfardo e
quella de Delfo, e non c'era 'na volta che lo en se
fermèva prima da ùn e pó da chl' atre a fè un quartin.
Era dispiaciutt un gran bel po' per sta
su' debolessa e un bel giorne, che c' aveva da gì in
Urbin, decid da stè fort e da non fermass ma l'osteria.
Da s'mo' passa davanti a Galfardo guesi de corsa, sensa
alsè 'i occhj, sa 'l cor ch'i bateva più fort del solitt,
e, sopratott, sensa fermass.
Alora tutt content va otra vers la
fermèta dla coriera, e, arivèt davanti a chl' atra
osteria, quella de Delfo, tot sodisfatt se dic :
«Bravo Don Pietro ! Se' stat propi brèv !
... Come premi t' meriti mezz litre !!!»
... E arentra da Delfo.
Nota:
Don Pietro è stato realmente parroco di
S. Andrea, piccolo agglomerato di case sulla collina
sopra Canavaccio,
dove si ergeva la torre (ora un rudere) chiamata "La
Brombolona".
Egli è ricordato, oltre che per la
particolarità raccontata nella storia, soprattutto per
la sua generosità : quando venne
investito lungo la strada (morì proprio per le
conseguenze provocate da quell'incidente), teneva in
mano una borsa con pane e pasta che stava portando alle
famiglie povere della sua parrocchia.
INIZIO
PAGINA
'N OMNE
BON CUM EL PEN
di Emanuela Poggiaspalla (Fermignano,
settembre 2003)
Presentata al
VI Concorso 2004
Questa è 'na storia vecchia, se chiud i
occhj me pèr d' arveda tutti i pestini d' un cinema.
Ve voj arcuntè la mi' voja de veda da
vicin 'n omne che meteva paura ma noiatre monei. Ma a dì
la v'rità era la gent granda che per facc righè dritt ce
diceva che ló c' porteva via, ma do' p'rò nisciun de
precis el saveva. Lo giva 'n pèra d' volt a l'ann a pied
tel Mun' Neron e i' pensev: "Vu' veda che ló, ma la só
c' ha 'na bella stiffa tutta d'ora du' ce tienn tutt i
monei ?"
A sei ann, ogg c' n'ho quarantadó, i', la
nonna, babo e mama sem gitti a stè fora d' Fermignen, in
campagna ma Ca' Vansin. C'erne poch ches, chla volta,
quella du' stev i', 'n' antre tre quattro, pió la chesa
vecchia da contadin du' steva la sì Rusina. Cum podet
capì malé eravem pochi 'na mucchia e noiatre monei quant
paseva 'st' omne fugivem cum i folett dentra chesa.
Pareva ch'eravem 'na mucchia d' pió da la ciatera ch'
facevem. Babo e mama c' avevne dett che lo era cum l'omne
ner d'le picciafavle e che se c' chiapeva c' avrìa
magnet. Capirè noiatre ch' fiffa !
C' avev 'na gran paura, ma cacianesa cum
er, pió paseva i giorne pió me 'uiva voja de veda da
vicin cum era fatt. Tutt le volt che 'l vdév a 'nì gió,
aspetev a gegia, a pansa sotta, a petta el gren, ma en
c'era mai 'na bona volta ch'en me chiapeva el pipacul e
fugiv dentra chesa. En el so cum è pudut a suceda, ma 'n
giorne i' me so' artroveta che dalla fiffa en gli ho
fatta a mova le chiapp del cul e so' armasta malé a
petta. Ló steva t'na casinina t'el pogett sopra Ca'
Vansin e zeg zeg, caminand t'la cunetta giva gió a
Fermignen. I' er nutta cum 'n sass, me se movevne sol le
palle di occhj e ..... cosé cminc a guardal. Mo part dai
pied perchè me pareva che se i' en el guardev t'la
faccia, manca lo m'avrìa podutt a veda. Tremev cum 'na
foja quant tira chla barburena fort fort. Mica mannich
... me pareva de giochè sa 'l foch !
Era alt e sciutt, c'aveva 'n péra de
scarp sa i curdlin, tutt' impolvaret, erne pió largh che
long e i pied dentra 'i scialacquevne. Quant camineva 'i
scapevne fora cum se portassa le ciavatt. Chisà che
numbre podeva essa ? Adoss c' aveva sempre 'na
palandrana longa 'n palm sopra la galorgna. E la paura
pió grossa, e malé anca i occhj me s' ènn impietritt,
l'ho vutta quant ho vist a scappè fora da pia chla
palandrana un puntirol de ferr. Madunina mia ! Sarà el
spitt du' ce mett i monei da cocia prima d' magnai ?
Alé, se me v'deva sarìa statta la mi' fin e me so'
vrichieta tutta cum 'na ghiffla. Mo, ma me, en 'i
conveniva a magnam, capirè ser quindic chil sa la balla
e tutt !
Me so' ringarsulitta, ho alset la testa e
ho arcminciete a guardal. El vlet savè sa era ch'el
puntirol de ferr ? Era la punta d' l'ombrella che
c'aveva sempre anca s'en pioveva e la tacheva só t' na
cuscitura d'la mannica d'la palandrana, sottabracc o
puriment tel sacucin: i' de precis en el so.
Le su' men en erne ruzz cum le fascin de
spin e manch en c' avev'ne i call. Erne secch e t'i det
'i se cuntevne ben le gnuculin di oss. Erne dle manin
civil. Quest el pudria avè anca insognet, mo, ma me, me
sa che lo c' aveva anca 'n strusin ma 'l coll. Porteva 'na
camiscia bianca e sopra c'aveva sempre 'n gilè. Quand
so' gitta per guardall tel mus pensev de veda 'na robba
mai vista, brutta, tutta gricitta e storta. Invec ...era
normel ! El barbuss era larg cum la piassa e la faccia
dai occhj in só era sempre granda ma 'n po' pió
mignarina del de sotta. Ma en era grossa. Aguss e non
tant curt era el su' nes, du' c'aveva dispess 'na
guciulina a spindolon. La bocca era fina, longa e giva
al dingió cum le su' spalle. I occhj erne pcinini e
stuffi e la pelle, sotta i pel canutti e longhi d'le
sopraciglie, pareva 'n paluncin mosc, ch' asmeieva ma 'na
pscicculina. Sotta la bretta 'i scapeva fora i capei un
po' longhi, dritti cum le sbrangh e tutti pèri. Erne
giai, chel gialarin ch' ardà tel verdulin. Pareva ch' 'i
aveva datt l'acqua d'le vitt.
En me pareva trist ansi era 'n nonn e ...
se la mi' nonna Peppa, ma me, me vleva bene, anca lo
doveva vlé ben ma i monei. Me tremev'ne 'n po' le gambe
e me pareva che me fev'ne cilecca, ma i' me so' alseta
listess e ... e ló m'ha ris. En m'ha dett niente e manca
en m'ha fatt propi nient.
Da chla volta en ho pió avut paura e
quant el v'dev arrivè da distant 'i giv incontre e 'i
dicev "ciao". Ló caveva el capell. Caminev un po' sa ló
dal pèri. Lo me guardeva, me rideva e me canteva sempre
'na cansuncina che ma me, me saveva tanta blina, anca se
ancora en podev capì cosa vleva dì:
"Duce, Duce, Duce,
come c' hai fatto riduce
di giorno sensa pane
di notte sensa luce".
En era stonet e me deva gust a stall a
sentì. Sta cansuncina l'ho imparata subit e qualca volta
la cantavem tutti dó insiem. Lo rideva quant i' 'i
chiapev la mena e vlev fè girè el su' brace sa 'l mia.
Ma el sua era pió long del mia e ló m'alseva da per
terra. Alora se ch' ridev tutta contenta: me feva fè "Vola-Vola".
Quant i' me fermev perche 'n c' podev gì
a Fermignen, era tropp distant e i mia en vlevne, lo me
feva 'n cenn sa la mena e 'sta volta i' 'i dicev "Ve
salut". Se qualca volta, de rèd, en el v'dev i', me
chiameva: "Vien Minina, sta 'n cuncinin sa 'l tu' nunin"
e m'arcunteva tant de chle belle robb che i' armanev sa
la bocca aperta, pareva che chiapev le mosch.
Sapeva leggia e scriva. 'I piaceva a
cantè e giva dispess tla fiera d'Urbin a comprè da i
cantastorie i spartitt perchè le canson vleva imparè.
Sapeva anca sonè e penset quant era ingegnos, feva sonè
'na gradella sa 'na cuchiera d' legn.
I so' sigura e nisciun me 'l pol levè
dalla testa che ló era pió bon d'un pess de pèn. Erne
chi grandi che c'avev'ne v'sutt metta paura per en facc
gì distant da chesa.
En ho mai savutt cum se chiameva. Per chi
'l cnosceva lo era "FISCHIELLI". El savet perchè el
chiamev'ne da sta via ? Quant era bordell e argiva a
chesa sua, da fè l'amor da la Teresa, era acsé content e
innamoret che ciufileva sempre. 'Na dunina ch' steva
vicina chesa sua, che da distant el sentiva a ciufilè,
ha cminciet a chiamall prima Ciufilin e pó Fischielin. E
daj ogg e daj d'mena 'i è armaste picichet adoss 'ste
nomarin propi blin.
INIZIO
PAGINA
|