di Ludius 2010

Te pens, ogni moment, e fall è vitta

ch’ se nutre solament dle tu fatess:

chiud i occh, sognand, e già l’ amor m’ invitta

a sospirè da te bac e caress.

Dentra de me c’ ho n’ “estasi” infinitta

che riempì me piac'rìa dle tu certess,

e vria che me sfiorasser i tu ditta

per damm, d’ continue, afett e teneress.

Donna, sirena, angiol consolator,

dentra de te se perd el sentiment,

com dentra el scur sparisc ogni color.

Te se’ la luc, se’ ‘l sol, do' artrov spent

ogni torment, ogni ansia, ogni dolor :

damm un segnal ch’ me faccia el cor content!

di Ludius 2010

Pac e silensi, persi in tl’ orizont,

da terra a ciel, dentra ‘n color turchin,

s’ alsne e se spandne, sopra e dlà di mont,

sa ‘na luc bianca, quella dle matin,

che vall e prat e fior e fium e font,

sfiora dansand. E tel mister divin

ognun se guarda intorne e se sent pront

a gì incontra, sicur, ma ‘n nov destin.

Dentra sta calma e sta perfetta quiet,

in tl’ aria ferma, per non disturbè,

le voc pian pian sparischne e piò segret

sensasion la natura c’ fa provè.

Dopp, tutt arman sospes e piò discret

sperans ognun s’ prepara già a sognè.

di Ludius 2010

E’ vera, piac l’ amor ch’ piac ma chi c’ piac,

che ‘n cor ma nantre cor tutt el trasmett:

e se daver vol ben, en se dà pac!

L’amor cerca l’amor e d’ un perfett,

pien sentiment s ’vol fè veda capac,

tant che nient possa, dopp che fort l’ ha strett,

smorcial, com el foc fa quand dventa brac.

E tutt quel ch’ è stat dett - e anca non dett -

ha da essa ‘n legam ben sald e fort,

tra ‘l nostre amor e cl’ atre, tant che insiem,

dentra ‘n destin comun, dentra ‘na sort,

han da sentiss, com nati da ‘n sol sem!

Quel ch’ i potrà divida è sol la mort!

E’ vera: piac l’amor, quand tel cor frém!

INIZIO PAGINA

Car dialett, ecca ancora qualca rima,

mo stavolta sa ‘n po’ piò seri intent,

e non per rida, com facev spess prima.

Le parol en le mia mo pro' quel ch’ sent,

sicur tel pensier d’ tanti è giust da cima,

sa l’ emosion ch’ me dè tun ste moment.

Te ‘l se quanta per te è la mi stima

e com me chiappa dentra el sentiment,

te ‘l se ‘l motiv, capisci ben el sens

ch’ me spign a scrivte ste quatre parol,

sa sta gran gioia, sa st’ afett intens:

poche, sincere, bastne queste sol,

poche, l’arcnosch, mo sa ‘n calor immens.

E adess è mej ch’ lasc gì, che ‘l cor me dol !

di Ludius 2010

Di’ de fè de sicur è men de fè,

perchè ‘l fè en val nient s’ è sol espress:

poca robba daver è ‘l sol parlè

se del fè la sostansa un en c’ ha mess.

In tla vitta vinc sempre el dass da fè

contra ‘l di’ sol, anca se ’n vien améss:

en serv a di’: ”Farò!” e po sognè,

che spess un sogn arman quel ch’ ha promess.

E alora, piò che di’, b’sogna ch’ se faccia,

sensa incertessa, sensa esitasion,

almen de no’ pò armana qualca traccia.

Da per lia en c’ ha forsa l’ intension:

de fatt, no de parol, tocca gì a caccia!

Da tutt quest en pol nì che qualch frutt bon!

di Ludius 2010

Se piega ‘l temp per artrovè se stess,

tel scorra lent de fatt e aveniment:

gioia e dolor, ch’ la vitta insiem ha mess,

s’intreccen ti soris e ti lament.

E cambia ‘l temp e ognun, or poch or spess,

c’ artrova dentra i piò divers acent,

per quel ch’è stat ‘na volta e quel ch’è adess,

ch’i piac’ opur ch’i porta ‘n gran scontent.

L’ ogg è dacsé, mo ’l dopp è già divers,

com quel ch’ credem eterne e sensa mot:

el ben, ch’ ce par tutt nostre, girà pers

e c’ armarrà soltant un sens de vot.

E alora ‘l viva c’ sembrarà somers

da n’ incertessa amara, vers l’ignot.

di Ludius 2010

El c’minciavi a sentì già da lontan,

da pied ai vigol, sa ‘n grid fort e chiar:

el sacch t’la spalla, strett ben tra le man,

el sguard incert, e, in fond, anca ‘n po’ amar.

‘Niva avanti, s’ fermava, argiva pian,

e, sempre seri, de soris avar,

s’ guardava intorne e stava com chi arman

a sptè calcosa: ”Donn! Ecca ‘l straciar!”.

I’ er bordell alora e cla figura

strana, un po’ sciatta, com in t’un sogn brutt,

me meteva, a guardalla, ‘n sens d’ paura:

lo, per qualch sold, chiapava so de tutt,

stracc’, pell, ferr vecch – de robb ‘na gran mistura! -

e po’ spariva, lent, com’era nutt.

CRONNACA (semiseria) D’UN MATRIMONI
di Ludius  (da un vecchio archivio)

Propri giust tel mezz d’l’estat,
sfnitt dal cald e tutt sudat,
sa la nebbia in tel cervel,
mentre in cammera bel bel
stav a lett a pansa sotta
e magnav un “Buondì Motta”,
ecch ch’vien dentra, sa ‘l pass sciolt,
la mi ma’: dacsè me volt
e la fiss sa ‘n sguard sospett.
“Beh? ‘Sa c’è?” “ Toh, c'è 'n bigliett!”.
C’ho ‘n susult, po’ me radriss,
e butt l’occh ma l’indiriss
ch’c’è t’la busta e ‘l francoboll,
per capì sa che’l controll,
in t’la gran calura estiva,
da du vien cla gran “missiva”!
Gir e argir el foj tle man
mo el dubbi ancora arman:
a la fin po’ me decid,
apre, legg e lanc’ un grid!.
Tel bigliett ch’c’avev davanti
c’era el sogn de du amanti
che ben prest - giorne beat! -
se saria realizat.
Fra tre stman - sentit sentit !-
la Maria, come marit
chiaparà el su’ bel G’vann,
(en insiem da ‘n bel po’ d’ann!):
e ste gran aveniment
tel Santuari d’un convent
se farà tel giorne tal,
po’ - e quest è quel ch’piò val -
sa i amich e sa i parent
-cert ognun sarà content-
subit dopp, sensa ‘na sosta,
s’girà tutti vers la costa
a sbafè t’un ristorant
ch’s’trova dietra, poch distant,
trenta metre in linea d’aria,
da la linea feroviaria.
A sentì ste grand event
dentra ‘n buliron me sent:
“G’vann se sposa la Maria?
Sem sicuri? Oh, mama mia!
La Maria sposa ma G’vann?
Mo daver en c’è l’ingann?”.
S’avicina ormai ‘l gran giorne
e cresc’ l’ansia tutt’ intorne:
i parent e i invitat,
sal vestit nov nov comprat,
se preparen sa i regal
a dè lustre ma i “sponsal”.
E dacsè, vent giorne dopp,
tutt tirat e sensa intopp,
per temp vagg, che ‘n se sa mai,
sa la macchina, vers Caj,
a chiapè du amich mia
per gì insiem, in compagnia,
ma c’la festa tant asptata
e po’ fè ‘na gran magnata.
Mo arivat in tel paes
ecch ch’incmincen le sorpres:
als el sguard e dal terass,
so in alt, vegg afaciass
l’Emma, pro mezza svestitta,
che a gì so da lor m’invitta
perché tant nisciun è pront.
I’ armang giò e in tl’auto armont,
ansi i dig ch’s’han da spicè
se per temp vlem arivè!
Dopp piò nient: e per mez’ora
sto malè e aspett ancora,
finchè fora da la porta
vegg scapè - per favla corta -
l’Emma, calma, sa’l pass lent,
e vers d’me, ch’già me lament
d’ tutt chel temp ormai ch’aspett:
“Sè! Me serv un regipett
e dacsè ‘l vagg a comprè!
Dài, sta’ bon e en t’agitè!”.
I’ en capisch daver piò nient
quand te vegg, dopp qualch moment,
Pepp, sa indoss n’aria avilitta:
“Mo, tu moj, du è ch’è gitta?”.
“E ‘sa so!” me rispond lo
“Sa’l casin ch’c’è ma la so,
tel mez d’tutt cla confusion
m’ha dett sol de stè un po’ bon!
Per daver i’ vria sapè
quand s’girà via da machè!
Me fa propri dventè matt
sa tutt quel che ogg m’ha fatt!
Mo s’cond te com’ho da fè
per lavamm? E fè ‘l bidè?
Potrò gì pur dentra ‘l bagn
sensa avè tutt le su lagn!
‘Dài, amor, movte, fa’ prest,
ch’c’è da fè anca tutt el rest!
Tira via, sciugte la schiena
s’no quel d’sotta già sta in pena
se ‘n gim giò sa ‘n po’ de fretta!
Tesorin! Fa ‘l brav! Dam retta!’ ”.
Ecch intant l’Emma ch’arvien
e per fè arnì ‘n po’ d’seren
i fa:”Amor, perché t’lamenti?
Ogg dovem essa contenti
de gì insiem ma ste gran noss!
Adess facc’ piò in prescia ch’poss,
pro daver c’ho già paura
che ‘n farem ‘na gran figura
s’arivam ma là in ritard!
So, adolcisc’ un po’ che ‘l sguard,
fa’ el brav, damm un bel bac’
e dacsè facem la pac’!”.
I rispond lo per ripicca:
“Vo ste sitta ‘na mulicca!
Per piacer, en parlè piò,
chiud el becch perché se no
ogg daver me fè incasè!
Tiram via e basta acsè!”.
A la fin, quand ce se mov,
en pasat da ‘n pess le nov :
mo comunque finalment
sem partitti e ce se sent
piò tranquilli e piò distesi
sensa piò avè i nerv tesi.
E filam vers el Santuari
do arivam giust in orari
e trovam tutti in atesa,
tel sagrat, fora dla chiesa.
Ce scambiam abracc’ e bac’
“Bella!” ,”Bel!”, “Ste ben!”,”Me piac’!”
e tra tutt sti cumpliment
sa l’esercit di parent,
ch’è daver nutrit e vari,
entram tutti tel Santuari.
Che belessa! Che splendor!
En c’è ‘n post du manca i fior!
Varda ! Adess entra la sposa,
tutta persa e timorosa,
c’ha anca i lagrimon ma i occh
e i tremen i ginocch,
mentre intant el su promess
da già in posision s’è mess:
el quadrett è ormai complet
sa i du spos davanti al pret.
Ecch, incmincia adess el rit:
“Te se’ moj e te marit”
dic el parroch per cmincè
mentre chiappen a versè
i present - mo che emosion! -
un gran piant sopra cl’union!
Ormai fnitta è la funsion
e s’ardunen le person
tel sagrat, tle man el ris,
da butè, sa ‘n gran soris,
vers la coppia, quand ariva.
“Tanti auguri! Eviva!Eviva!”.
Mo intant qualcun, d’nascost,
già t’la macchina ha pres post
e sta sa’l motor aces
per la voja ormai tutt tes,
de volè in t‘un istant
vers el mar, ma’l ristorant!
É arivat ormai mezgiorne:
c’è chi sogna p’cion al forne,
chi lasagn, chi tajatelle,
chi gran piatt sa le fritelle,
o già pensa, chiudend i occh,
ma vassoi pieni de gnocch
opur c’mincia già a stè mal
per un bel cosciott d’maial:
c’è chi gira intorne el coll
pregustand t’la ment un poll
cott ben a la caciatora!
Mo perché asptam ancora?
Ecch, è fatta! Via, partensa|
Per la strada, giò in pendensa,
sa’l pedal spint a tavletta,
corem fort, sa ‘na gran fretta,
fin che vdem, com tun incant,
alt, bel, grand, el ristorant!
“So, parcheggia!” ,“Scend!” ,“Aspetta!
En c’ho manch ‘na sigaretta!
L’ho da gì propri a cumprè!”.
“Dài, t’aspett, mo en tardè!”.
Se va dentra: bel ambient,
e malè subit la gent
s’catapulta a precipissi
in t’la sala, per l’inissi
ch’darà ‘l via ma la magnata,
el ver scop d’tutt la giornata!
Pronti alora! La forchetta
in t’la mana già ben stretta
e tel coll el tovagliol
en c’avem che ‘n pensier sol :
de riempì la pansa prest,
sa ce frega piò del rest !
Mo armanem parecch malè
e qualcun cmincia a dmandè
perché en c’ portne ancora nient.
“ Camerier “ chied qualch present
“Sa suced? C’è qualch intopp?
En ve par d’asptè ‘n po’ tropp!”.
“Ce dispiac” un d’lor rispond
¬-e ste fatt, beh, ce confond -
mo en potet essa servitti
perché i spos da ‘n po’ en sparitti!”.
S’alsa fort ‘na gran protesta:
“Ecch, adess c’mancava questa!
Varda te se s’ha da fè,
propri adess che ora d’magnè,
‘na cassata d’sta portata
ma sta gent tuta afamata
ch’magnaria anca i tavlin!
Camerier, arporta el vin!
Ste forchett so’ stuf d’guardalle!
Chi t’ha dett de non portalle
cle pietans ch’en t’la cucina?
C’ho ‘na fam da stamatina
che’n vegg piò manch la mi moj!
Giò, c’minciam sa ‘n para d’poj!
E se i spos en gitti via,
pegg per lo e anca per lia!
Ansi, sta a sentì ma me:
quand i vedi arnì machè,
ma la sposa e ‘l su marit,
di’ che ‘l da magnè è già fnit!”.
“Amorino, sta’ compost!
En t’fè arcnoscia in ogni post!
Sta tranquill, e non sbraitè,
en c’è atre che aspetè!
E po’ modera el linguagg:
en el vedi che t’un ragg
de tre tavol han sentitt
quel ch’è dett? E sta’ un po’ sitt!
So, da brav, famm el favor,
abb pasiensa, dài amor,
e s’c’è fam, car maritin,
magna, toh, sti du grisin!”.
“Te i grisin j’è da infilè
en dig dov! E guarda che
se chi do tarden ancora,
car la mi bella signora,
chiapp e vagg a dài la caccia!”.
E giò n’antra parolaccia
se sent, nittida, in dialett,
pro en ve digh quella ch’ha dett!
T’un chel mentre, meno mal,
spunten, calmi, per le scal,
i sposin sa ‘n gran soris:
finalment d’arnì han decis!
“Oh, scusat per el ritard!
En avem avut riguard
vers voiatre! Perdonat ! ».
Beh, dài, tutt è ormai pasat|!
L’abufata pol cmincè:
sopra tutt a sorvolè
ognun par adess dispost,
perciò sotta sa i arost !
E tra mezza le portat,
tra batutt e gran risat,
cresc’ per tutti l’alegria
tun c’la bella compagnia!
Torta, brindisi, confett,
ma i sposin n’abracc’ strett strett
facem tutti, augurand lor
d’amass sempre, sa ‘n gran cor.
Tutt è fnitt e la brigata
arpart a la spiciolata:
anca ‘l bonumor se scioj
mentre G’vann guarda su moj.
Sta per f’nì intant el giorne:
forsa, è l’ora del ritorne!
 

INIZIO PAGINA