|
|
EL GAZETIN DLA PIASSA D' URBIN
(Ogg v' arcont dle chiacchier ch' sfan e ch 'se senten
a girè per la Piassa)
Presentata X Concorso 2010
Pubblicata in
Agenda 2011
"M' archmand, San Crescentin !"
Gìren tla Piassa d'le voc
tutte aflitte che propri cunfort
en t' dan, ch' digghen... che:
«Machè gim propri mal,
sa tutt ste truff e corusion
ch' èn dventate 'n' istitusion,
tra chi spreca e tra chi robba,
c' è chi s'ispira ma l'art de Michelacc,
c' è chi tira a campè e c' è chi sgobba.
Girem a fnì de mal in pegg,
maché s' parla sol d' paghe,
de paghè 'na mucchia d' tass.
E pó c' fan veda a la television
che tra tutt i partitt, en fan altre
che un gran bagaiè e rimbecass
e, tra gl' insult e i lor litigaticc
èn tutt scen ch' fan... sol el chiass
e manca en t' risolven un... cass,
mentre intant cresc la mundessa,
l'acqua, la benzina, la luc, el gas.
Ma se va propri ben! Ma nó gim pur
davanti dacsè, a en fè altre che
tirè fora i sold a profusion, tant
ormai c' hann pres per d' cujon.
Ah sé, sem propri arcunciati per le fest !
En c' è propri piò 'na mulicca d' rispett,
c'han pres e c' arbalten cum i calsett,
ma che c' tratten cum fosmi d' fess,
ma, se pó, cum s' mormora e s' sent
a dì, e speram ch'sia sol per... schers,
ch' en s' ariverà manca pió a pagacc
le pension, alora, sè che s' girà
a fnì tutti sa la testa in tel... palon.
Tant ma cla brava gent, ch' sta
ma là, a cmandacc dal Palass
dla greppia e ch' manda avanti
'sta baracca scucialata per capicc...
vol dì ma noiatre.
Anca se 'i acusasmi d'essa di corrotti,
e 'i dicesmi ch' èn e s' cumporten ugual
a di furfant, ma anca a dirgli
ch'èn un branch d'ladre e d' dilinguent
matriculati, è listess d'fai di...
cumpliment».
C' è el sollitt sostnutt ch' c'ha i sold,
ch' s' vanta e dic :«Ma me, de sta
situasion m' ne frega men de gnent,
en me fa 'n baff, en me tocca 'n dent,
e manca m'importa propri un mannich.
Me dispiac per viatre? propri no! Ma me,
la facenda m' arman propri indiferent».
E c'è invec chi s'fa prenda dal pannich.
Alora invochen le Legg e la Costitusion
contra sti governe e sti aministrator.
Da tutt le part s' areclama la Giustissia,
che per sti furfant c' vojen i prucess;
ma calcun sbotta: "Per safè, cusè
èn sol altre sold sprecati, adess maché
i temp en cambiati e, me daret ragion,
che in 'ste Paes ogg piò nisciùn...
va in prigion".
A sentì scunsulat ste brutt nutissie,
tra i mugugn e i sbrontolament ch' fa
la gent, par dessa dentra un vespar tant
en fitti sti lament che t' fan nì la depresion,
cusè dop t' chiappa l' afann, vien l' umor ner,
che t'rodne el fegghett sa tutt i raguiam.
E po' c' è el pessimista che cum fa
al su' sollit s' mett a fè... l' astrolligh,
e inchmincia a fè la su'... prevision
che già i disastre... presupon.
«Guara te, cum sèm ardotti, chi
taja d' qua e chi taja d'là, tutti fann
i brav chirurghi, ch' me par d'essa
cum sfossa un incub a... l' uspedal,
ma sarà mej a dì invec, ch' me par
d' essa dentra gran macell.
Sa 'sti reddit ch' c'avem, per chi
quattre sold che c' dann, vedrem
ch' sarà sempre pió dificil ch' ariverem
malla fin di' ann, ma prò s' preved,
e manca el negh, che già a fatiga s'ariverà,
cumprand sol el pan, a la fin del mes,
tant ch' ormai rasegnatve en c' armaran
piò manch 'i occhj per piagna».
El poppol quant s'tratta d'tribulè
sta a sentì atent a la television
le nutissie sa 'i urecchj dritti per
potè dop manifestè tutt el su' malcuntent
tle Piass ma 'l Guverne del mument.
Onna prò! Che disastre, che tracoll,
sèm arvinati, derelitti; per giunta adess
s' è agravata anca la crisi, ch' ha purtat
al colme dla beffa chi ha esaperat la situasion.
E cusè sem arivati al pegg; duvrem
preparacc a rinuncè prima d'tutt ai bei...
viagg per i "Camp Elisi".
Mo va là, s' vlem magnè, maché c' tocherà
invec acuntentacc d' un "Camp - icell",
per facc un urticell, da sappè per
piantacc 'na balla d' patat e pó facc
n' arcolta d'insalata e d' pundor, magari
du suchin, du mlanzan, un sachtin d' fagiol.
Mo ma che tra el corra el fuggia,
è la volta bona ch' gim a fnì tutti
a p'r aria, a gambritt, altrechè le vacans,
e le crucer sa i gran viagg per beacc
da gì a brunzè le chiapp tle solatie
e cald spiagg dei bei Paes esottici.
Purtropp, d' quei duvrem scurdacc;
c' artoccherà argì piutost ti nostre lidi
a rusulè la schina fin a scutacc.
Aah! Sé sé, sèm propri tl' arvina!
C' artruverem cum l'Argentina ?!
O farem la fin dla Grecia ?!
Se maché la situasiòn en argirerà
per el vers giust, sarà del tutt inuttil
a... dì, o a... fè; insomma ! Sa sti
quattre ch' corren gió per la china
altroché a gì a bagnè el cul in t'i bei lidi,
argirem a spigulè e arcoia i stridi,
c' artuccherà gì a prenda el picon
per gi a scavè el carbon in tla miniera,
insomma, maché, tocca facc curagg
e argirè le mannich e a metce a lavrè
dur per dè 'n avenir ma i nostre fiòl
se no puretta lor, s'en creden ma chi
vien a fè i miraccol, s' artruverann
senza men sa la cacca fin al... coll».
S'alsen dle voc d' maldicent, piene
d'livòr, ch' ne digghen de tutt' i culor;
ch' fan più dann de cle sfuriat d' vent
ch' seminen l' angoscia, el spavent.
«Porett st' Urbin sa tutt i cittadin
s' en fossa per chi do Turicin
sa 'l turisme e per chi quattre student
ch' artiren un po' sò le sort econommich
ce scansen da gì giò miserament a fond
da val, tel precipizi a rotta coll a rugulon,
in t'la disperasion s' en strova 'na solusion».
E pò, c' è chi dic: «Adess l'inflasion
galoppa a stroppa cerquelle, che a ste punt
i mument èn brutti, sèm vicin al tramont».
Ma c' è anca calcun ch' la ved anca pegg
e dic: «Ansi ma me, me par d' essa t' la
nott piò scura, sèm propri cunciati mal,
e manca en s' vegghen risors per armedialla,
m' arcorda ch' el dett, ch' dic che...
sensa lilleri en se lallera.
Ma che, sem propri ardott al lumicin;
par ch' sèm arivati a tirè gl' ultim...
ansc.
E adess spol anca inchminciè a dì le
nostre orasion, è giunta la nostra...
fin ?!».
Pro datme ascolt, statme a sentì
anca la voc de chi è sagg,
che c' arcorerà e c' farà curagg
che c' informa, e dic: «Alegria !
ades metet via cle brutt facc,
en v' avilitt, en stat imburgnitti
fatve forsa e statme sò arditti,
arcurdatve che noiatre c'avem
ma Un ch' sta d' casa mal Dom,
ch' è 'na vera Pruvidensa, la nostra
risorsa, la manna dal Ciel, basta gill
a preghè e purtai un cer d' acenda
tl' altar ma 'l Nostre bel e bon,
ma sopratutt tant Misericordios
Prutetor..., Sant Crescentin.
Git a implorall ch' sfacessa daver
'na Grassia per salvacc da ste
sventur ma noiatre ch' sem d 'Urbin».
Ma, da malasò da cima del su'
Baldachin, Ló surid, e dic: «Mah io
Ve ringrassie de cor ch' varcurdat
da nì da me, prò c' è nit sol ti
mument del bsogn; so' è vera
el Vostre Sant Paladin e ch' nit
da me per arcmandav, prò ma
voiatre ormai per tirav fora da
sta situasion en ve basta manca
da gì a preghè ma tutt i Nostre
Sant piò caritatevol del Paradis.
Tutt'al pió anca se la strada adess
è piutost mal' ardotta e tutta buc,
potet pruvè da gì a truè, s' ve dà
l' apògg clatre Sant, ch' io cnosch
e mi vicìn; chiapat la strada ch' va sò,
per el Cimiter, e git da Lò, da...
San Bernardin.
Dit ma Lò che ve mand... io, e vedret
che Lò bon cum' è, ve chiaperà tle su
grassie e v'ascolterà e cercherà de niv
incontra e d' esaudì le vostre supplich».
E cosè, i Citadin, tutti d' corsa van
a preghè ma 'l Sant sa tanta devusion.
San Bernardin a sentì tutt de lagn
accorate cum s' fosser 'na Messa Cantata,
s' emoziona e se cunfond e per la cumusion
i venghen gió perfin i lagrimon e repplica:
«So cuntent e ve ringrassie ch' set
nutti a preghè da me sal cor tle man
e pieni d' calor; mah! credetme pur,
io tutt ste gran pusibilità en c' l' ho,
en le pusegh e manca en c' ho d' le
gran richess, tutt quel che io c' ho
e ch' m' apartien, ch' ve poss dè,
e che poss spartì, sa ognun d' voiatre
è sol un pestin d' terra, ma...
è terra bona, per piantacc el cec».
Pró, no Cittadin ch' sèm listess
pur pieni d' ottimisme e de risors,
stam sempre a la grilla, che anca
se queste èn tutt robb ch' suceden,
en dam tant pes ma ste malelingue,
en ce scuragiam, piò del necessari
en c' facem prenda e stravolgia dal
pessimisme, dal scunfort e dalla fiffa,
stam alegri e facemce piò annim, tant
ormai è già segnat, el nostre destin
cum quel d' essa di pover babusin,
ch' venghen rinchius dentra 'na...
stiffa.
|