Gastone Cappelloni Autori Dialettali: Homepage

PARLE' SA LA COSCENSA
di Gastone Cappelloni – Sant'Angelo in Vado

Parlè sa la coscensa è 'n dover,
fè 'na riflesion duvria esa 'n piacer.
Facend un gir mal cimiter,
chel silensi m' è entret t'el pensier:
m' dmandèv el valor d'la vita terena,
i dubbi, le angosc, le paur, l' anim sempr in pena.
Pensand a ment serena
guardèv ma la mort, ma'l su' sentiment,
per tutti uguel, dal ricch a la pora gent.
E' brutta, per qualcun anch' irriverent,
en risparmia nisciun: serv o potent.
La diferensa la faran le lettre tel marm
p'rò ma tutti soffia ados el gelid vent.
Anca el tip specel
servit e riverit, è ma noialtri uguel,
la mort el chiema sensa abasè el capel.
El Padretern premia el camin,
e d' tutti, sol d' chi l'ha volut vicin,
e se legg t'el profond d'ogni cor,
alora sé ch' avran da tremè i tanti impostor.
Chi tun 'sta vita ha guardet sol di soldi el color,
e sa I' impostura per tutti dimostrevn amor.
Anch' i' m' sent un pecator,
so' 'l prim a dové chieda perdon ma'l Signor,
ch' ma l' rob materiel i do 'n gran valor.
En pos condanè ch' ialtri, e le lor asion,
quant duvrì fè i' el “emea culpa” t' un parecchj ocasion,
e chieda perdon d'le mi tentasion.

EL RISPETT DUVUT
di Gastone Cappelloni – Sant'Angelo in Vado

I' so cunvint che la cosa più important sia el rispet
per l'ansien, sia 'na roba duvuta dai anca afet.
En c' scordem chi ha fat tant en merita d' esa scanset,
en è giust ch' qualch volt vien tratet cume fussa 'n impestet.
Saria più giust tratal sa la teneressa,
sudisfasion per ló saria riceva 'na caressa;
purtrop a volt vien tratét sa la fredessa;
invec l'ansien meritaria più gentilessa;
en c' scordem che la vita per ló è stata d' tribolasion,
ha lavoret tant, trop, en vol ch' el mettne t' un canton;
En chied gnent, en vol esa al centr d'l'atension,
i basta sol che 'l tenghn' in considerasion;
Non sol per chiapai l'acompagn e la pension;
en s' pol difenda, è cume 'n monel, trateml sa l'amor.
Steml a ascoltè, d'quel che dic femn tesor,
parecchi han fat 'na vita d' sagrifici, sol d' lavor.
Quel ch' han fat, l'han fat sa la fatiga e sa'l sudor,
e se adesa stem ben, el merit è anch' el lor;
l'ansien en vol esa un pés per nisciun,
p'rò en vuria manch pasè la su' vechiaia in solitudin,
en è roba da butas via cum pensa qualcun,
ma vuria viva t'la coscensa d'ognun;
perchè anch' ma no' el temp pasarà t'un moment,
alora, se'l capirem, l'ansien el tratarem ben veramente
e sarà part del nostr viva, e del nostr sentiment,
i si vorà ben, sensa soportal a stent,
perchè la vechiaìa arivarà per tutti, t' un atim, cume el vent;
e se sarem trateti anch' no' sensa rispet,
dopp sé ch'sarà 'n gran lament.

<INIZIO PAGINA>

LA MAMA: UN FIOR RÉR
di Gastone Cappelloni – Sant'Angelo in Vado

Mama risoluta e pasient
te'l bisogn, sempr present,
discreta e mej invadent
anch s' en t' sfugg gnent.
Pronta sa l'aiut inteligent
vicin, sensa essa apariscent.

Mama, fort e generosa
grassie per la tu presensa amorosa,
cundita sa 'na delicatessa rispetosa.

Mama, giusta e vanitosa
d'la famiglia ne vè orgojosa.

Mama, se' 'na figura presiosa
carismatica, mo silensiosa.

Mama,"rude" e delicheta
fort sé, ma non sgarbeta
se' la cosa più apreseta.

Mama se' 'l fior più splendent
d'amirè in qualsiasi moment
adess, e sempre, ma Te sarò riconoscent !

<INIZIO PAGINA>

UN PARADIS D' MORT
di Gastone Cappelloni – Sant'Angelo in Vado

Quant famij hann pers la lor serenità?
Quanti ragasi la droga ha portet t'l'oscurità
e conquisteti sa la su' falsità ?
Quanti genitori hann visutt o vivn 'st' amera realtà ?
Maledetta droga, intorn a te c'è sol dolor
bugiard el tu «Paradis», rifug d'amor
asurda speransa d'un fals color
ma sol, purtrop, un mond fat d' teror.
Perché tanti, tropi giovani c' casch'n prigiogneri.
E ma la « mort » vendn i lor pensieri
e i afidn sensa pensac i desideri ?
Forsi te'l « buch » afoghn le frustrasion
opur el trop « benesser » dà asuefasion,
la gran noia i dà disperasion
la miseria l'hann dentra, a volt en è sol emarginasion.
C' hann tutt. En c' hann gnent, c' hann la voja d'annulass
d' provè el brivid te'l bugars
e l'asurdità d' giss a cerchè d' amasass.
... Anch'i' ho fatt tant « casett » da bordel
m' sentiv important, m' ritenev un tip speciel
p'rò en ho mej mess a repentaj la pell
e mej cerchet chel « buch » per tochè le ... stell.
Nisciuna predica, per carità. Sol delusion
da part mia te'l veda tanta desolasion
tun voiatri giovani. E t'le famij nera disperasion !

Perché en dann importansa ma la « lor » vita ?
Asurd pensè d' en viva e fala f'nita
e cerchè la mort, com 'na figura ... amica.

<INIZIO PAGINA>