BEN  TORNATA  FONTANELLA

Presentata al I° Concorso 1998

Era ‘n pess che se sentiva a dì

de ‘sta fontana ch’ aveva d’arnì,

e specialment i promotor

s’ éren messi de gran vigor

a fè la sottoscrision

da portè in Comission.

E dacsé tutt le matin

Giulio in piassa sa’ l tavlin

e le foto dla fontana

ch’ c’era in epoca lontana,

per convincia le person

a dè le lor adesion.

Prò t’ el Comun la Comission

ha fatt pió volt le votasion,

perchè c’era chi en la vleva

e gì avanti en se poteva;

ma alla fin per un vót o dó

‘sta fontana hann arméss só.

Ecc’la, bella, arnovata,

anca tropp incipriata,

‘sta fontana ottagonal,

come prima, sempre ugual,

t’ el mezz sorg un zampilant

com ’na coppa de spumant.

‘Sta fontana acsé arpulitta

ha ardat un po’ de vitta

ma sta città un po’ in pensier ...

e specialment i forestier

fann el “grupp” intorn a lìa

per scattè la fotografia.

C’é soltant l’inconvegnent

che quand tira un po’ de vent

sprussa l’acqua dai lat

e d’intorne è tutt bagnat;

e po’ tra ‘sti mur antich

me par ch’ fa anca tropp spicch,

mo ormai de vedte maché

l’abitudin c’è fatt chiappè.

Ben tornata, cara fontana!

t’ pol dì sol chi, come me,

de quand c’eri s’ pol arcordè.

Te ce fè ardventè burdei,

quand i gioch éren pió bei,

come “cut” o “chiapparella”

intorne a te, fontana bella.

Adess el mond é ‘n po’ cambiat:

c’è ignorant, maleducat,

c’è chi spacca e chi sporca,

mo tè, cerca de stè acorta

e quand vedi ‘sta gentaccia

butti un ragg d’acqua t’ la faccia.