LA  MASCHERA

Presentata al I° Concorso 1998

Ho artrovat t’ el fond, dentra un casson,

‘na vecchia maschera fatta de carton

ch’ metév tant’ ann fa, de carneval,

per gì al ciccol o per gì tun chi local

do’ se balava, per en fass arcnoscia

s’ c’ avevi la pell bianca oppure roscia,

s’ c’ avevi ‘na faccia brutta o ‘l nas tort,

s’ eri ùn per ben o un beccamort,

s’ eri un pess gross o ‘n porett:

la maschera cupriva ogni difett.

Sempre ‘na faccia tonda sorident

che dava allegria ma tutt la gent.

L’ho presa t’ le man, i ho guardat,

e po’ sa’ n po’ de rabbia i ho dmandat:

«Com fè a essa sempre d’ bon umor,

de non avé subìtt manch un dolor,

epur del temp n’è pasat un sacch,

c’è stat la guerra e tutt chi atre aciacch,

tun ‘st mond ormai s’è arbaltat ‘nicò

e te, com fè a rida, propi en el sò !?»

Cla faccia d’ cartapesta m’ha rispost:

«Te, sa’i tu piant e i tu lament,

di tu’ guai è mai risolt gnient?

Se l’ mond è oggi tutt’ arbaltat

sa l’ tu piant l’è forse indrisat ?

se t’ van mal i afari e la salutt

a lamentat è forsi risolt tutt ?

La gent t’ pol di’ “purtin” per fatt cuntent

mo sta sigur che non i frega gnient.

Va là, come me, sta in allegria

e se te chiappa la malinconia

còpret el mus sa la faccia mia.»

I ho détt: « Te fors parli malament,

mo t’ la tu testa en c’è minca gnient !

Te manca el cervell e anca el cor

è per quest ch’ en se’ sa ch’è ‘l dolor.

Serviresti sol per le gricc mia

mo s’ me chiappa el sconfort sudarìa,

alora te ch’ se fatta de cartaccia

t’ amosceresti come la mi faccia.

Va là, va t’ el casson, sta pur ma lè

e spera che qualcun t’ venga a chiapè.»