|
LA FILA DAL
DUTOR
Pubblicata ne "I quattre
vent" n° 3 - 1982
Avet mai fatt, o
gent,
la fila dal dutor?
En è un divertiment
a sta per tre, quattr'or,
in pied sensa gi' a seda,
perchè tutt occupat
da chi, veda o non veda,
tra lum e scur s'è alsat
dal lett per chiapè el post,
d'inverne opur d'agost.
Dagh 'na guardata intorna,
sempre le solit facc,
per veda se me torna
d'andà opur da stacc.
«Guardat che quei malà
fan tutti le ricett».
- m'ha dett una che l'sa -
«Va ben, alora aspetti
Chi è l'ultim entrat
che vien prima de me?»
Malé han subit tacat
tre quattre a bagaiè:
«E' lia, no è d'atre!»
«I vengh prima de vo'!»
«Mo mancaria atre,
so' entrat insiem sa ló!»
«Va ben, lasciat pur gi',
che l'ultim adess so' i'!»
'Na stanza un po' stretina,
'na pussa de rinchius,
'na luc d'na lampadina
ch'en s'ved manch chi atre mus.
Sicom è d'inverne,
c'è un termosifon
sa quattre vecchi intorne,
mo el cald è 'n'illusion...
Alle diec', dalle scalett
ariva el Dutor Dino,
dà via le ricett
e dic: «Avanti il primo!»
Dacsé incminc a 'sptè
e per masè un po' d'temp,
ch'en c'ho gnent da fé,
sent i discors dla gent.
«O Marietta, com ve va?»
- dic ma una la Rusina-
«Chi dulor cminc'ne a passà?»
«So' maché per la mi schina
ch'me dol un po' se pend,
quand facc le mi facend».
Mo un vicin m'ha det
eh'va per i ottantasett...
Magari se ha cl'età
podessa fé listess,
saria un bel campà,
ma ma me dol adess!...
C'è parecchi ansian
pasata la stantina,
qualcun un po' men ann,
c'è anca qualch sposina
per arfè fè la bocca
ma chel por dutor,
sa chi vecchi che tocca
en è un gran lavor.
Pro sa la sposina
ce bada un po' de pió,
en i batt sol tla schina,
vol gi' anca pió in gió...
Chi toss e chi starnutta,
chi parla e chi sta sitt,
chi ch'ha la bocca sciutta,
chi è mezz avilitt.
Qualch donna fa el merlett,
chi c'ha da fni la maia,
chi comoda i calsett
ma 'l fiol ch'è 'na canaia.
Po' c'è chi fa el comissi:
«Guarda sa ch'sa da veda!
Che Italia sgangarata,
è robba de non creda
a ste' mezza giornata
maché per 'na ricetta!
S'è bsogn d'na medicina,
anca sa un po' de fretta,
t'va via 'na matina.
E' colpa del Governe,
c'vria 'na botta d'Russia
ma tutt sti Padreterne!»
I ha dett un poch lontan
che in Russia fan la fila
anca per cumprè el pan...
El temp cmincia a passè,
ce avicinam tla porta,
la gent cmincia a calè,
pró fam la bocca storta
perchè propi adess
è arivat un viaggiator
che ma tutti ha fat fess
infiland dritt dal dutor.
Vedrè, quand arivam
dentra l'ambulatori,
sa i dulor eh' c'avevam
di atre ne scappa fori:
per dinne un com sia,
t'vien la nevrastenia...
Acsé, car la mi gent,
se c'avet qualch malann
en stat a senti gnent,
e per non fé pió dann
a chiapè di atre dulor
fat ni' a casa ma 'l dutor...
|