|
LA
NEV
di Nino Cesaroni
Presentata al V° Concorso 2001
Le campan dla chies vicina
sonen a chiocch stamatina
e p'el gir di Debitor
en se sent tutt chel rumor,
se sent sol qualca vocina
dai scialpon ch'fann da sordina
e la Laica che abaia
par ch'è sotta 'n crin de paia.
Subit facc el pensament
che c'è qualch inconvenient,
sent a dè dle sbadilat,
en c'è dubbi ha bufat.
Scend dal lett, dagh 'na guardata
vegh la strada imbiancata,
tir pió in só la tapparella,
dic mi' moi: "O questa è bella !
C'è 'n solustre, ogg c'è 'l sol ?"
"No, hann stes un po' d'lensol,
e arlucne perché 'i hann
lavati tutti sa'l Dixan ! ..."
Prò guardand ste panorama
tutt de bianch come 'na dama
fresca e bella com 'na rosa
in chel giorne che va sposa,
podrè dì sol quant è bell,
com facevi da burdell
che corevi tutt cuntent
sa du pess de legn scadent,
per travers qualca striscia,
so p'el Mont a fé la liscia;
eri el pió felic del mond,
anca sa le scarp tutt sfond.
Adess se la nev 'i manca
van a fé la "stmana bianca",
mo ma nó d'na certa età
anca questa c' bastarà.
Sè, d'acord, a veda è bell
mo era mei quant'er burdell.
|