S'ARFORMA L'ORCHESTRA

Da qualca sera, a la medesim'ora,

fors da la stessa pianta,

el Cucch arcanta

la vecchia e cadensata

nota: cu cu . . . cu cu ! . . .

E non se stuffa

e non arprend mai fiat . . .

è un ucel disgrasiat

sa ch' la voc scansonata,

pró ve sa dì

che la bona stagion è ormai tornata

ed anca lo, a su mod, se fa capì !!

S'arforma ormai l'orchestra d' Primavera

ed el prim Profesor ad arivà

è sempr'el Cucc, se sa,

Profsor de Contrabas

artista da strapass ! ! …

Mo' quand piò cald è el sol

e pio seren el ciel

eccate l' Usignol

sa'l su' flaute divin

dal bosc, sotta le stelle . . .

e grill e raganelle

e tanti atre animal

l'acompagnen in cor

sa 'na gran frenesia !

In t'i foss i ciambott

fan la part di fagott !!

Tutta sta Sinfonia

quant nott m' la so' goduta

apogiat in t'la fnestra

dla mi cambra, sol sol a casa mia.

E fra d' me 'niv pensand

cosa mai vlessa di'

sta gran musiga strana . . .

e, pensand, armirava a la lontana

el Ciel stelat, la su' volta infinita

e pió me sprofondav

int'el mister dla vita . . .