A  PROPOSIT  DE  ‘STE CONCORS

Pubblicata in: V'arcont in dialett nn. 1 e 2

La Cassa de Sparagn de Pesre e Urbin

ha bandit un concors sensasional,

sa l’intent d’ arsveghiè i cervei pió fin

tra i popolan e tra i inteletual,

che possen tutti insiem fè ‘l gran miracol

de conservacc el nostre bel vernacol.

E infatti è ver, com digghen, che ‘l dialett

corr el rischi gravissim d’estinsion

per tutt ‘ste novità e per l’efett

nefast e stuppid dla television,

o per colpa de qualch testadecass

che, invec de dì “coriera”, dic “el bas”.

Sia chiar: en voi fè com chel cavalier,

ch’ vleva “el diporto” per en dì “lo sport”;

è che me sent avilitt per daver

quand ascolt ma qualcun d’ sti becamort,

che, dop ch’ è stat in t’ una gran cità,

pensa d’avé gambiat identità.

Com s’ èssa nati vers Urbin o Fan

sia guasi n’etichetta ch’ fa vergogna,

da essa presi per forsa per vilan

o per gent che se porta adoss la rogna:

parle d’ molti de quei ch’ èn gitti via

da Pantan, da Ca’ Gall o da Soria.

S’ èn gitti a Roma è ‘na disperasion:

en usen né ‘l dialett, né l’italian,

mo pensen d’ fatt pasè per un minchion

parland volutament t’ el mod pió stran.

En te dmanden: ”Che cosa fai di bello ?”,

mo digghen: ”Sce sta questo, sce sta quello”.

Da Milan, pó, t’ arvien certi sogett

tutti rimidi e pieni d’eficensa,

che, per fè sbalordì ma nó porett,

arconten o ‘na balla o ‘na scemensa.

“Ho fatto sciopping “, dic ‘ste sciagurat,

com s’ en sapessa ch’ c’è ancora ‘l mercat.

E pó: “Lavoro con un nuovo pul ”,

agiung mentre te tira per la giacca;

e te vien voia d’mandall a fancul

ma ló e ma tutt chi  atre gran patacca.

Scusat s’  me scappa qualch termin ardit,

mo è quest che rend el tema pió condit.

L’ho imparat tant dal Belli, quant dal Porta

(mica per fè, per carità, un confront):

la lor vena sarìa de cert pió smorta,

sensa salsa picant in t’ el racont:

de Porta sembra che el sonett pió bell

sia un de quei dedicati ma l’ucell.

********

Quand ho cminciat a fè ‘st’ componiment

ho dett che pur Urbin fa part dla Cassa,

non perché el vlessa usè come strument

d’ na protesta, ch’ sarìa stonata e bassa,

ansi per dì che ‘l nostre entroterra

è da ‘n bell pess ch’ alsat el cul da terra.

Produc cultura e riesc a sopraviva

sa le fors sua e la su inteligensa,

salvand un patrimoni che spariva

per ‘n abandon al limit dl’ indecensa.

E non è un cas ch’ la class dirigensial

vien quasi tutta dai mont e dai crinal.

La Provincia s’ artrova President

un professor, fedelpidiessin;

la su’ origin è quella di parent

è dla nobil contrada d’ Cavalin.

E schersat poch sa Cavalin e Schiét:

el precedent era de Piandimelet.

Cla contrada ch’ ho dett, donca, è famosa

perché ha fornit tanti sindaci in pasat

per Urbin, e n’avria sfornat a iosa,

fin a quand i capoccia dl’aparat,

per dispona d’un pió nobil metall,

èn gitti a prenda un sindach nov ma ’l Gall.

Quest maché, prò, ha fiutat un altre odor,

pió apetitós d’ quell ch’ c’era t’ el paés

e s’ è artrovat elett com senator,

per ordin dla federasion psarés.

E acsé, dop ch’ è pasat un para d’ann,

l’ultim sindach è nutt só dai Trasann.

Donca è ver che i pió gran politicant

provenghen sopratutt da la campagna

e che la lor impostasion ruspant

è ‘n gran merit piutost che ‘na magagna.

Anca a Peser (la cosa en sembri strana)

el sindach è ‘n giovnott ch’ vien da Gadana.

En vòi fè, credet pur, el ritornell

che s’ usava perfin in t’ i giornal,

sa’ l scop de tenda qualch infam tranell

ma chi en vantava nobili natal.

Questa è soltant una costatasion

che s’ fa per celebrè ma Pasqualon.

E’ quest el fondament de ‘ste concors,

che per disgrasia impón men de cent vers;

me restarìa, perciò, ‘n po’ de rimors

d’ avei sprecati tutti e d’ avé pers.

Mo sa tutt chi prosciutt ch’ ho regalat,

un piasament, almén, è asicurat.