|
EL CUNDITÓR
Svanìtt per areclàmm indiavlàt
ingasarìtt dla moneta
arriven tanti all'ardunaticc specialisat
dla "cultura alimentare", del dgiùn, dla "dieta".
I còch sa i capplon;
gastronom capiscion;
quei ch' tenghen tra indic e pollicc
el piedistal del calicc
e degusten el vin
sa la bocca a cul d'galin;
rafacàn leterat;
el cler sgolfanàt;
i mèddicch del settor;
i pió pinsòn sapùtt de tutt'i profsor.
Per l'orgòj dl'imbisios ardun
inganscìtt de birbarì
president consijer segreterì
d'asociasion sodalisi società;
sempre present el minister dla sanità.
Per sandrón e minutàja
magnat a stuff
ingonsat a strosc
e pó, sploda de foch artifìcial,
"seminari, simposi, dibattiti, relazioni",
listess de bgiòligh, pàppol, cianc, arvultiloni.
De 'sti fatutt la gran marmaja
a strascinon tl' identica brodaja;
se sbrodolen tra d' lor,
en parlen per la gent,
la massa popolar en c'arcapessa gnent.
- Èn bone e belle
le tajatelle.
- Per marpión e alupìtt
i boconòtt rabìtt.
- Tla testa e tra le gamb el scarùss
d'i caplett lampàt sora 'na tvaja d'luss.
- Forne biraròst pignatta caldàr tegamin :
è sempre 'na goduria el sor baghin.
- Sa spianata crescia o ti cascion
broccol verzèll lischer spargin vitalb e tufiron
en sarann propri el capon
mo manch ròbba p'i minchion.
- L'insalata de campagna,
caccialepre scarpign rapastei,
se capa quand se magna;
slargheggien òmin e donn, i brutt e i bei.
- Seller e fnocch sa cassimperi e vin,
sa poch sal dafne lupin fav fresch e radicin
per stangon e tracagnòtt
per tribulin e ciambòtt.
- A bonora, prima d'metta l'abbit dle fest,
el poracc scatissa el foc
per bagiana o fav a gricc
biett carpinell o arcoiticc;
per smezzè 'l giorne sensa stracass
suppa de cec d'lenticch de fagiol;
dop dla banda musical, prima del lett,
t' na tvaja fresca de bucat
sopr' un tavlin tarlat
pansanella sa i ov tost
o, al temp lor, i grasciolett.
En era molt el nutriment
mo la bona compagnia
d'ogni boccon intingol ecelent.
Ste sementin cultural
sti spiciulin d'ingegn
ste mulichin de sturza
sti badurlìn
en arrovellen el cervell
arriven tutt d'un bòtt
da ciafagna schiribiss prodott;
fan ben ma la salut,
gingillen el paidì;
l'arabatàss sens'arabiss
aiuta a campè: com stè alla solina
anca tel verni.
In pió de quel montefeltresch ducal
hann 'i urbinat un stemma popolar :EL CUNDITOR,
un oss de prosciutt dipint al natural
tna paranansa bianca de color.
Era 'n oss girandulon:
più volt in famèja usat
spess ai vicin prestat
dava saporin ma la minestra,
rustich simbol de miseria nera
era aprì m'al sol 'na finestra
la forsa dl'amicisia vera
un spiritacc sminchionat consolator
per le fatigh de casa e del lavor.
|
