LA  BROMBOLONA

di  Lidia  Ottaviani  Pasquini

Urbino

Mo, guardat che bell capricc ch' m'è nutt

voi arcontavv el fat d'la Brombolona

in t'la stessa magnera ch' lo saput

en è gnanca tant temp, da 'na persona

che stava malagió ma Primicili

ch'era un casant de Ubald Basili.

T'l' undic' (1911) dacsé scriveva el cont Nardini,

cminciand un poemett propi genial,

che piaceva ma tutti, grandi e pcini,

p'rò nisciun n'ha saput fè 'n antre ugual.

Io en so scriva com ha fatt el cont,

mo p'rò sa la mi' testa un po' balsana,

qualco' voi fè, che quand guard ma chel mont

guard chel castell ch' c' ha 'n'aria propi strana.

Vegg 'na torr tutta bianca, solitaria,

che me fa 'nì 'na gran malinconia;

arpens ma quand s' sentiva per tutt l'aria

i tocch d'la Brombolona in allegria.

C'la volta se sentiva da Spadon,

lungh el Metauro per tutt la vallata;

la sentiven anca da Fossombron,

tutti godeven de c'la sbatocata.

Dop d'la guerra nisciun l'ha pió sentitta;

adess t'la croc c'hann fatt un ristorant,

l'hann chiamat Brombolona per dai vitta,

anca se dal castell è un po' distant.

'Sta gent, io diggh, en pensa sa vol dì

quell ch'è el significat d'la Brombolona;

mo fra 'n po' d' temp avrà ben da capì

perchè en capita pió manch 'na persona.

Io me rivolgh ma i amministrator,

ma chi s'è interessat d'la Torr Cotogna:

per el nostre castell en s'è prés cor,

com se questa fossa 'na vergogna.

Oh responsabili d'i ben cultural

fat qualcosa anca per la Brombolona,

perchè se no maché va tutt a mal,

en ce sarà mai pió 'na robba bona.