L'AQUILON DLA PROTESTA

di Sirto Sorini

 Pora festa dl'aquilon
t' hann guasi mess in t'un canton,
poca gent che t'organizza
e chi poch en fann a rissa;
a pensè che i furestier
fann le cors fina 'l Piansver
per potè veda sta festa,
e qualcun pò darsi ch' resta.
C'è sol rabbia e volontà
de cle diec, doddic person
ch' s' dann da fè tun sti rion,
corrne, sbatne tun chi fond
de qualch casa intond intond
che qualcun un po' seccat
ma sitt sitt i à imprestat.
A pensè che i ann passati,
per sta festa di aquilon,
(vagh indietra in tel temp
quant sti burdei en c'erne per gnent)
er burdell sa la cometa,
per Lavaggin, gió tla pineta,
a truvè nov solusion
per sta festa dl'aquilon.
Io m'arcord dla prima festa
ch'avev vint p'el più luntan,
la giuria fa 'l mi' nom
e me chiama per premiam,
tutt cuntent com i burdlin
so' git so tel baldachin
per chiapè la premiasion.
Mamma mia, ch'emosion!

Per quest'ann la nostra festa
vol sembrè una protesta,
non è tant per la giuria,
ch'en è facil giudichè (mo anca lia ...)
ma sopratutt è quei dl'Azienda
che m'la voine scancelè
sta pora festa bistrattata,
sa i su' ann sopra la groppa.
Fin che c'è quei dla contrada
tutti i ann tienrem a botta.
Qualca volta, tel pasat,
i privati, come Fuffi,
en riuscitti a fè 'l festin
per la gioia di burdlin.
Le rinunc, i rinvii,
per el temp pioviginos!
basta dì da quant è cminciata
sett ott ann è stata saltata.
Cert ch'en è tutt ros e fior,
gim avanti anca sa lor,
e vedret dai Capucin
el nostre Pascoli fè l'ucchin
e sorrida tutt content
da veda chi color tel firmament,
i urle, i strill
de chi più pcin,
le cors tla pineta
sa le madre vicin;
'na giornata de gran festa
da trent'ann è sempre questa.
Cert che quant sarò più vecchj,
magari sa'l fiat gross,
la gobba, el bastoncin,
chiapp 'na canna,
du' pess d' carta colorata,
vagh so ma la pineta
e cerch sa tutt el cor
da butè so la mi cometa.