LA  CRICCA  DEL  MERCATAL

di Raffaele Zampolini

C’è ‘na cricca t’ el Mercatal

che t’ el mond en c’è l’ugual.

Tutta gent de bon umor,

tutta lingua, tutt rumor.

Gioca alle bocc e alle cart

e organizza cene ogni quart,

se sfòtt a pió non poss

tant ch’ i s’ingrossa perfìn el goss.

Tropp ce vrìa a parlè de tutti,

e per dìvv s’ èn bei o brutti.

Ve parlerò di più important,

de chi tip che s’ vanten tant.

Cminciàm da un bel panción

che tutti chiamerém Baioccón,

spess i tocca cert stangat

d’ armana imbambolat.

Qualca volta le dà ma tutti

d’archiapè perfin i frutti.

In contrast c’è un tip com un oss,

e per quel el chiamen Pioss.

Se vanta d’essa el re dla scopa,

mo la sostansa è sempre poca;

se dichiara el león dle bocc

mo spess i tocca gì t’ le sacocc.

Se stima un gran cantarìn,

mo nessun ce créd a Urbin.

C’è ùn che camina a ciampicón

e per quel el chiamen Nottolón.

Fa el fornar e s’affacenda

per preparè ma tutti la merenda.

C’è anca un vecchi negosiant

che véd poch da vicin e men da distant.

‘Na volta sonava el mandolin

e andava in cerca del merlin.

Adess ha datt l’addio ma la chitarra

e ha arpost anca la scimitarra.

C’è anca ùn ch’ en s’acontenta mai

e invec dla pac, combina i guai.

En è mai acondiscendent

e en se riguarda manca dalla gent.

E’ el spirit dla contradision

e guasta spess la ricreasion.

En manca un vic notari

che maneggia i cambiari

d’ i artigian e commerciant

d’ i operai e ambulant.

I piaci tant de rusighè

e cerca sempre de magnè

e de stè alle cén in allegrìa

insiém a tutta la compagnia.

En manca un fratel d’un frat

che spess è piutost sgraziat

perché d’un littre ne bév la metà

e per i atre com la va, la va.

El su gioch dle cart è sporchicc

e magna pan prosciutt e salsicc.

Quand sta per perda la partitta,

invoca el fratel: aìta ! aìta !

Ecca un bon e brav artigian

che i vetre ha sempre tra le man.

Tranquil, calm e sorrident,

quant canta arduna la gent.

Ecch’ ariva un piccolin

che tutti chiamam Tersìn,

el su nóm p’rò è ‘n antre

e cerca e créd d’essa scaltre.

Quant parla se paoneggia e se fa ross

e se gonfia a pió non poss;

se pó chiappa ‘na cantonata

allora è fatta la frittata.

En badat se la cricca

en è pó tanta ricca;

in compens è piena d’allegrìa

e se distingue per l’armonìa.

La storia en finirìa maché,

tropp ce sarìa d’ arcontè !

Sarà per ‘n antra volta

e la farém più dritta e meno storta.