Concorso 9° Poesia dialettale urbinate- Tutti i testi

CHISA' SE
di Anna Rita Ambrogiani - Urbino, 11 agosto 2015.

Chisà se… magari, alla fin,
tutt quell che resta è sol un bel miragg,
com la natura splend t'el mes de magg.
So sol ch'en m'importa da sapell,
in fond el mes de magg è el mes pió bell.

Ho scavalcat montagn
e pasat fium in piena.
Ho traversat deserti infocati
e me so' persa t'el profond del mar.

Me so' brusciata t'un foch de rogh.
Ho caminat tant temp per grepp e foss
sa 'n gran magon e 'n gran dolor adoss.

Ho caminat in t'i buron e fran,
e l'ho fatt sa i pied e sa le man.
Ho caminat sa rabbia e a denti stretti,
me so' chiesta e archiesta e archiesta ancora,
mo, è che da malé en s'niva fora.

Ho caminat indietra, indietro tutta
perché a gì avanti me sentiv perdutta.

Ho caminat tant sensa trovè
e sensa un post do' pudé arivè
e do' magari pó pudemm fermè.

Ho caminat scalsa in mezz ai sass
e ho sentitt crolamm el mond adoss.
Ho vist tutt'i color del Firmament
che pro en erne colorat per gnent.
Me so' schiaciata sotta 'n cel de piomb:
ho provat un dolor ch'en c'era ugual
malasó t'el parchegg de l'Ospedal.

Mo dal profond del mar so' arnutta a galla
e en è statt com el vol d'una farfalla.
Ho provat a rialsè ste cel cadutt,
ste cel de piomb ho provat a puntelè
perché cosé en pudessa pió caschè.

Alora ho sentitt el profum d'l'aria,
ho vist el cel azurr, ch'en era prima
e l'acqua fresca e el vent che te caressa
in t'la matina, già cascat la guassa.

Ho vist e imparat a arcnoscia le stelle,
quelle ch' s'vegghne
sol se è nott scura, dacsé belle.

E quel ch'ce salva èn la tenacia,
la speransa, i sogn, la fantasia,
cosé alla fin la trovam la via,
en ce perdem in t'i meandri oscuri
perché c'è sempre un cel stelat
che ce consoli.

E quant pensi ma cl'immens perdutt
t'acorgi che alla fin…
te passa tutt.
T'acorgi che alla fin
quest… passa tutt.

L' ALBRE DLA DISCORDIA
di Anna Rita Ambrogiani - Urbino, Gennaio 2015

A Urbin…
ma i politici: Sgarbi, Verdi e magioransa,
j è nutt ma tutti el mal de pansa.
E' perché nisciun vol tort,
è 'na question de vitta o d'mort.
Litighne per l'albre de Natal:
"Ce sta ben o ce sta mal?"
"I' difend el mi' operat…"
"E' 'n obrobri, chi l'ha inventat?
"E sopratutt chi l'ha pagat?"
L'autor d'i bassoriliev
se sprofondaria t'la nev.
Han scomodat la Sovrintendensa:
"Dovem fè sa l'albre… o sensa?"
Sopratutt Sgarbi j ha scritt
per ripristinè un diritt.
Sopratutt Sgarbi ha tonat:
"St' albre chi l'ha piantat?
La fontana ha copert,
en s'ved manca de travers.
E' illegal, 'na brutura immoral,
sotta 'ste Palass Ducal,
cum s'fa a mettle malà
che deturpa la cità.
A Natal, le cità
han da essa più belle,
no più brutte
e quest è valid per tutte.
En va ben t'el centre storich,
tirat giό cla spec d'obrobri,
è el più brutt del mond
a girall a tond a tond,
è brutt da fè paura,
s'arvolta anca la natura.
Questa è 'na cità d'art,
portatle via da 'n'antra part!
Levatle da sotta 'sti tett,
s'en el fat i' me dimett!"
"Tutt a post, in regola, va ben,
s' el levat, me c'incatèn!"
J rispond la Crespini
per la gioia dei bambini.
"S'el portat via da malé
dovét portè via anca ma me,
fin a la Befana ha da restè!"
Alla fin intervien Gambini
che deciderà in coscienza…
vria fè sa l'albre…e sensa.
Chiappa temp,
e, dopp qualca telefonata,
assicura: "La strutura nirà spostata."
Dopp un po' d'ripensament,
per la pac de tutti quant
smonterann el monument.
Quattre giorne j ce vrann
e a la fin el smontarann.
Passne i giorne, un e dό,
la scultura è ancora sό.
Passne i giorne e invec malé,
la vedem ancora a stè.
I giornal n'hann parlat,
la curiosità ha aumentat
e ste albre dla discordia ,
bell o brutt,
ha avutt el su' moment de gloria.
J urbinat èn divisi
e c'è chi è anca un po' arabiat
perchè nisciun l'ha interpelat.
E se sentne i comènt,
a voc bassa, un po' tra i dent:
"So' d'acord, ma me me piac."
"Ma me no, a vedle, è brutt un gran bel po'."
"Bell en è, mo 'sa èn tutt 'ste pretés…
a la fin starà sό un mes!"
"Oh, per me è anca bell,
sembra un po' la Torr Eiffèl.
Le su' luc colorat
alla fin èn delicat."
"E' brutt fort,
chi el dic, en c'ha tort,
a guardall da vicin
en c'entra propri gnent sa Urbin,
è pesant, ingombrant
e sopratutt è invadent"
"E' artistich, en è invadent,
s'dici acsé en capisci gnent."
"E' el contrast tra el vecchj e el nóv,
va a capì… el sann sol lor!"
"Mo 'sa c'hann da litighè
che tant poch c'avrà da stè!"
Anca j student s'èn risentitti:
"Dopp la laurea, sa la fontana
en poss fè la fotografia
da portè a casa mia."
Vlet sapé pó 'sa è sucess?
A la fin lό en s'è dimess,
lia en s'è incatenata
e el Sindac la strutura en l'ha levata.
Fortuna è arivata l'Epifania
ch'l'ha portata via sa lia.
Pro de ste monument
en s'è saputt più gnent,
tutti a chiedse "Ma du' ch'è fnitt?"
dopp un po' ch'era sparitt.
"C'l'avrà el Sindac, l'assesor,
l'avrà arprés el su' scultor?"
En se sa che fin ha fatt,
se è argitt da chi l'ha inventat
o è fnitt t'un scantinat
e malé l'han abandonat,
quattremila euro j è costat!
Chisà se prima dla fin dl'ann…
in t'la piassa l'armetrann?!
O se Sgarbi, pό, chisà
a Ferara el porterà?!

SP'RAM DA CAPÌ TUTT
di Massimo Arcangeli - Urbino

Sp'ram da capì tutt,
'na bona volta,
sp'ram d'capì
chi è ch'è stat
a cumbinè st'pastrocchj,
a rimpì el mond
de gent de tutt le rass
ch'n'hann cumbinat tel temp
d'ogni culor,
c'hann fatt un gran miston
d'guerr e d'amor,
ch'hann costruitt
t'ogni canton
muraj e pont,
ch'en gitti a ucupè
desert e mont,
ch' s'en inventati
grupp per grupp
le religion,
ch' s'l'en datte sa le spad
e sa i baston
perché ognun de lor
vleva ragion,
chi sé, insomma?
se 'n concentrat
de muscol e potensa
opur 'na grossa succa
strapiena d'conoscensa?
fatt veda finalment e facc' capì
perché è tutt quel ch'vlem
prima d'murì:
te bada, acidentacc',
adess ch'è tolte el vel
em vist ch' se' sol un bugh
sa 'n ciuff de pel.

CHI LA FA' S'L'ASPETTI
di Massimo Arcangeli - Urbino

A la fin d'setembre, scavalcand l'autunn, l'inverne cmincia a morda. L'aria giaccia ariva a l'impruvis dalle stepp del nord e abassa le temperatur d'colp; de nott sal cel stlat, tla vall, la brina cala sora l'erba.
Marchin aveva durmitt pòch, piό d'una volta Ricardo l'aveva sentitt a cichè el su pess de toscan e ogni tant acendeva 'na mulicca la su bella pipa d'radica.
Tel dormiveja i rumor piό pcini arivavne ma'l burdell cum 'na botta de tambur,e l'udor del fum apiciava dentra d'lò dle fantasij bizarr.
Al prim chiaror, quatt, quatt, el nonn s'alsa, se sfila la camiscia da nott e per 'na mulicca, per un attim, Ricardo el ved nud brill, bianch cum 'na tassa d'farina, sa tutt 'j atribut in vista; a stent riesc a tratiena el ris ch'j sgurgava sό fin dal stommich.
El nonn s'vest t'un lamp, la cambra fori dle cupert era giaccia cum 'na neviera; in punta d'pied sa tutt l'ocorent sguilla giό ma'l pian d'sotta.
El su pensier viagiava cum un luzzin, in avanti: i su fiol da distant sarijne rivat per arvedle e avria vlutt per lor qualcò in piό di solit macaron sa i fagiol.
Acend la centilena, la stansa s'rischiara. Suzi, un bastard dal pél rόsc, sbuga da sotta el tavlin e 'j s'abrancla madoss, guaisc e 'j lecca le man per la cuntentessa: aveva già capitt ch'sarijne gitti a caccia.
El nonn magna per clasion 'na tassa d'cafè d'orz sa 'n gocc' d'mistrà e 'na fetta d'pan secch.
Suzi ingoia t'un lamp 'na sbobba d'sembla a bagn tla sciaquatura di piatt dla sera prima.
Adess en tutt do' pront, carichi e tirat cum 'na corda d'viulin: "Stat atent lepre, starn, quaj; stat atent" pensavne el can e 'l su padron. Un attim dòp, sa'l tascapan de fianch, la dupietta a tracolla e le man tle sacocc' ch'argiravne le unich tre cartucc' del numer dodic', la caccia cmincia.
C'era apena un barlum d'luc', l'aria pepata e g'lata pisscava la faccia del nonn vessa ma tutt i rigor, qualch spiffre, cum 'na lama giaccia, stusicava le part del corp men protett.
Suzi e Marchin s'avijne vers el pont de cord, atraversne el fium e seguen l'argin scansand i cepp de ginestre e de giunch.
Finalment el vecchj caciator s'decid, aissa a voc' bassa mo decisa el can: "Dai Suzi cerca, dai bello dai!", el can scatta cum 'na molla liberata dal ferm, fend la brina sa'l mus disegnand tra le stoppj dle giometrij improbabil.
Strett tla su giachetta Marchin, carich piό del su schiopp, guardava i gambiament de diresion de Suzi, sa l'indic' tel grilett pront a sparè.
El fredd la fava da padron, tutt do' se sentivne inrigiditti, el nas dla bestia , guasi cungelat, aveva pers ogni pussibilità da sentì j udor; chel bastardin rόsc s'aquatta sfnitt vicin ma'l su padron, guasi insiem s'guarden in tj occhj, erne rivat tutti do' ma la stessa cunclusion: la caccia era fnitta.
Un attim e j occhj d'Marco s'acendne d 'na strana luc', un ghign de sudisfasion j s'disegna tla faccia: d'là dla sciep de spin ner e de olivell, tl'ort ben custuditt de Tugnin, 'na robba l'aveva incuriusitt, veloc' el bracc porta el calc' dla dupietta tla spalla, la testa s'incurva a mirè, el colp part secch e precis.
A palla de schiopp el botol e 'l nonn balsne tla stessa diresion, cum du' complic'se guardene intorne: tutt era in ordin; la preda sguilla veloc' dentra 'l tascapan.
Quand el nonn ariva tun casa el fόch del camin era cés, se strupiccia le man, poggia l'artiglieria, chiappa sa i det un tiss, el fà saltlè tel palme calos dla mana, l'infila tel furnell dla pipa e beat fuma.
Ormai sigur e sudisfatt, slunga la man vers la sacca e, mentre la nonna aspetava incuriusitta, tira fora 'na bella palla arancion: "Ogg ho sparat t'na succa".
I fiol, stavolta, avrien pudutt gustè, oltre ai macaron sa i fagiol e le cuddich, un bon contorne d' succa cucinata sa l'oli, l'aj e'l fnocchj selvatich.

PILU'
di Massimo Arcangeli - Urbino

Cotnus coggygria, quest è 'l nom che la scensa ha dat ma chel cespuj de scόtne agrapat ti strat scomid del bisciar ch'formavne tun chel punt 'na bella balsa. Cum di cugn rubust le raich erne penetrat t'un cla pietra dura, guasi da dventè un tutt'un sa questa, permetend ma la pianta da crescia sigura tel vòt.
Le vόc', dle volt bass e dle volt stridle e sguaiàt, s'rincorevne rimbalsand da 'n cap a cl'àtre dla macchia; i can indafarati tla cerca guaivne, cum fossne stat imbriachi s'infilavne fra i cèpp d'rόgh, de bruscle de ròs selvattich, sensa badè mai picchj di spin gussi e periculos.
Pilù fraid de guassa s'acascia per terra sa la lengua a spindulon, scarich d'energia, sgonfi, straciat, pareva sfinitt da la fatiga, mo testard rissa d'nov el mus per fiutè,sent, sciolte t'laria, le tracc', le particell piό pcin, la fotografia odorosa de quel ch'cercava e cuciutt cum un sumar s'arampica vers el còlm dla rippa, malè do' la macchia p'areva de fόch a causa dle foj ross del scόtne in abit autunal. El cépp bell e ingruvijat spunta a l'impruvis. El can c'era rivat sa'l fiaton gross, seguend la su' traccia invisibil. Insigur se blocca, per un attim en sa ch'sa fè, alsa la testa e dilata le naric' piό d'na volta e aspira l'aria per analizè mej 'j udor che questa cunteneva.
Pilù s'inrigidisc, le su incertess dvente certess, l'immagin de quel ch'cercava ormai era chiara tla su testa e sa 'n scatt s'infratta scumparend tra chl'intrecc' de ram de chel cespuj da la chioma rossa.
Ricardo sudat, guasi incolat ma'l vecchj, ariva tel post. Ogni ann el prim giorn de caccia, la squadra se 'l strascinava dietra cum porta furtuna, Marco, el nonn, 'j dic' d'entrè tra 'l gruvij dla ramaja, lό c's'infila veloc', Pilù el salutta scudinsuland la coda cum sempre, mentre sa la lengua lecava la preda: un giovne e sfurtunat leprott.

S'FANN LE VALIG SA'L MAGON D' LASCÈ'STI MADÒN
(Raccolta: Tra ricord allegorie e fantasie)
di Arturo Bernini - Urbino

Ai lettori:
Perdunatme la licensa d'avè scritt ste lagn
messe insiem a la men pegg
e anca sta volta avet paciensa e abbiat pietà

Da cant, propri ma lè, de fianch al Dom e sotta el su' cupulòn, c'era la Scola del Libbre, dov' io ho studiat; alora era dentra in tle grand e fredd stansòn dl' imponent Palass Ducal, che dop qualch' ann, tra gioie e tribbol c'ho appres l'istruzsiòn; so' d' ventat, pensat un po', "Maestro d' Arte".
Dop, sa chel pes d' Carta, nauseat da st' aria pruvincial sunachiosa, pigra e sensa lusinga desiderav d'famm un avenir e com tant giuvinot smaniosi e sognanti, animati de sperans, e de aspetativ, smaniav d'afrontè l'esaltant aventura, confidand ch' s'aprissa la porta dl' attesa e sperata furtuna ch' m'avria fatt scuprì in tle gran Città del nord, 'na nova esistenza.
Sa'l temp, finalment s'èn averati i desideri da gì fora per la tanta sperata occasion da gi' a lavrè e d'incmincè cla nova esperienza.
Pró, credetme pur anca s'er felic com 'na pasqua, dentra, prò, ha dì el ver, er propri vilìt da lascè ste Piass e sti Palass perché d'entra d'lor c'era el mi cor, sa tutt i raguian.
Cusè in principi, a malincor e 'na grand tristessa, ho dovut fè i bagaj e po' so duvut partì, gì via, gì luntàn pien d'rimpiant per sti bell Sit d'Urbin: granda era l'uggia de lascè sti quattre madon.

MA DOPP STA GITTA, LA FELIC ARNUTTA TRA I MI MUR
(Raccolta: Tra ricord allegorie e fantasie)
di Arturo Bernini - Urbino

Mo prò dop, sa 'l passè di ann la logorant routin dla Città granda te crea disag, t'cresc la solituddin e, credet'me pur, s' afievolischen 'i entusiasme e se smorcen 'i ingansc e le aspetativ; t' arsal sempre piò cucent la nustalgia, el rimpiant d'avè lasciat cla Dimora, anca sepur insunnulitta, pcina e pigra; è stat lia ch' m'ha vist a nascia, m'ha aiutat a fè i prim pass e amè el bell.
Er propri depress: el stè luntan da sti Mur me dava tristessa e me nivne i gropp tla gola e per sti magòn, spess me niven caldi e copiosi i lagrimon.
Trascors un pò d'ann, tra i sopportati dulor de stommich, qualca vucina de circustansa ha riaces rosea la speransa d' arturnè tra la cinta dla mi "Città".
Alora spes e sempre piò fort me frulava tla testa l'idea e la voiarina d'arfè la strada a l'indietra; e de truvè anca sta volta la porta dla Dea bendata aperta.
Ecca! Finalment, un giorne è giunta la bella nutissia tel temp tanta atesa, el mi sogn a la fin daver s' era realizsat e dentra el cor me sentiv tutt gasat; er tutt scumbussulat per la grand gioia e emusiòn. Alora muriva l'illusiòn, mo nasceva la certessa, perché finalment potev dì ch' s'averava el mi ver Destin, d'arrnì per sempre tra i mi car e i mi madòn d' Urbin.
E tutt cuntent ve digh che per cumpiacensa d' una benevola Sorte en s'era aperta 'na porta qualsiasi, mo adiritura quella del Gran Palas: s'era apert el "Purtòn".
(Mo pro quant ho duvut studiè per el Cuncors )
Arturo Bernini

LA CASSETTA DLA POSTA
di Maria Grazia Borgiani - Urbino

Quand guard la cassetta dla posta è quasi sempre vota, arrivan sol le bollett! En scriv più nisciun. V'arcordat le cartolin dle git, dle vacans, sa tutt i paesagg?
Te scrivevne per fatt sogné. Se cercava de trové le cartolin più adatt per fè bella figura. Se pensava: "Adess ma chi le mand? Ma la sia, ma le amich, sensa scurdé nisciun".
El bell niva quant avevi da scriva el test, pensavi e ripensavi, alla fin se giva a fnì "Tanti saluti da...".
Arcodas l'indiris de tutti era un'impresa, pensavi e ripensavi le vie e ne niva in ment un po', atre cartolin se davne a man, acsì se risparmiava anca tel francoboll.

LA VECCHIAIA
di Maria Grazia Borgiani - Urbino

Com se sa ce se invecchia sensa accorgsene. A 'n cert punt dla vita cmencne i prim aciacc. La pression aumenta, i oss te fan mal, la memoria te fa i brutt schers, en se pol magnè più nient, la carne te fa nì la gotta, el pan, la pasta te fan nì el diabet, i dolc en ne parlam !
I ochial che portav sempre en van più ben, e corr da l'oculista.
Prendi un colp d'aria te vien subit la bronchit.
Tel prim te rivolgevi sempre ma'l dottor e via a fè i raggi, pù la risonanza magnetica. El dottor in seguit te ordinava le pasticch, e me so' fatta na collesion!
Adess me so' quasi rasegnata, quant sent i mi malan, pens: "cambierà el temp !"

LE DU GENERASION
di Maria Grazia Borgiani - Urbino

Guardand in gir pens che la mi generasion è stata più fortunata.
Io so' na settantenne, tla mi generasion c'era più speransa.
Era fnit la guerra da poch, tutti se davne da fè per cancellè i dan dla guerra, tutti se aiutavne.
Poi c'era la passion politica, sa i dirigent che credevne verament tle lor idee (Moro, La Malfa, De Gasperi, Di Vittorio, Nenni, Pertini, Berlinguer...) per dirne qualcun. Questi discutevne tra lor anca se avevne idee diverse, ma tutti pensavne al ben dl'Italia.
Nel '54 è arrivat la television, tel prim se giva a vedla tla sala parrochial, pu' pian pian è arrivata anca tle cas. Questa ha portat el progress, se sapeva cosa succedeva fora dle nostre mura, pu' ha unit l'Italia insegnand la lingua, perché tle varie region se parlava el dialett.
Adess com accendi la television senti parlé dle rapin, mort violent... I politici urlen sensa discuta verament, tel Parlament se tiren de tutt sensa rispeté nisciun, manca el President dla Repubblica.
Vedi i giovne a giré sa i telefonin tle man e le cuffie ma le orecch, invec de parlass se mandne i messagg. El computer ha pres el post dla television, perché sa quel se fa tutt!

CLE BURDELLE D'UNA VOLTA
di Anna Maria Capellacci - Urbino

Un giorne cald e caliginos, me sentiv bsogn d'una mulicca d'aria fresca. So' gitta so da cima al mont e me so messa a leggia un giornal a seda t'una banchina. Ogni tant dav un'occhiata ma Raffaell, sopra el monument, tel mez di giardin.
All'improwis sent una voc "Burdelle gim a seda machè". Le Burdelle erne un gruppett de vecchiette. Dalle voc ch' se sentiven parevne anca arzille, sa tanta voia da discorra. Pareva ch'era da un pess che en se vdevne.
Ormai avev pers la concentrasion e ho cminciat a stè a sentì quel che dicevne. En era per essa ficcanas, mo parlavne acsè fort che ho imaginat che fossne anca un po' sorde. Dop vari "com va e com en va" en arrivate ma i malan. Ognuna c'aveva d'arcontè el sua, acsè so' nuta a savè quant fossa dolent el mal dle gamb, quant fossa dur da sopportè el mal de schina, quant el cor batessa fort, la pression s'alsassa tropp e la sciatica ch'le sgamblava.
Erne convint che le medicin en favne nient. Quel che dicevne di dottor en me sent manch d'arcontal. Ne dicevne peste e corna, pareva parlavne d'un sciacall ch'le vleva fè muri per fè arricchì ma'l governe.
A un tratt, giò per el vial, passava 'na coppietta giovna. Lia sa 'na minigonna sopra du belle gamb. Lo mandava 'na carosina sa dentra un bel burdlin.
Ma le Burdelle i passa tott i mal e passne subit ma le maldicens. Parla una inviperita: "Mo guarda che vergogna! Ai nostri temp en era un schif dacsè. Dop se lamentne se i om i dan l'assalt. No' serne serie e vestit coperte. Ste ragass d'adess gambien i ragass com i vestit. No' n'avem cnosciut un e ce sem fermat malè. Adess se sposne, poch dop se separne, poch dop s'arsposne. Com se fa, en han più voia da fè nient, manca da fè i fiol".
Ecte cl'atra: "E' ragion, ste donne invec de fè le facend e da preparè da magnè ma'l maritt, van in gir a fè "shopping", che en el so manch sa vol dì, van sempre a fè i capei e a spass sa le amich. Ai nostri temp en era acsè: ce tocava sol lavrè. Gismi a strascinon ma i lavatò, a stirè cle braciat de pagn, sa i burdei taccati ma la gonna. En se pensava de separass, si matt?! era un scandle, se sopportava e basta. Avem fat tre o quatre fiol e i avem arlevat alla belle mei. Adess i fan badè ma chiatre e anca ma'l marit. Do s'è mai vist un om a gambiè le pannucc o a gì a spass sa 'l carettin? Era na vergogna!"
N'atra burdella, che era stata sitta fin adess, e che fors era anca men anticca, scappa fora tutta rabitta: "se el marit gambia i panlin me sa giost, anca perché, quand creavne sti burdlin c'era anca ló o me par ma me? Avet ragion che en c'era el divorsi, ma chi ve dic che no' eravam più contente de lor? Com se fava a separas sa quatre o cinq fiol sensa un lavor? Ce tocava soportè el marit com'era, bon o trist e qualca volta anca la soc'ra ce dava i ordin. No' sempre a di sè a testa bassa. Ce tratavne come i strac. En contavne propri nient. En avet capit che ste burdelle d'ogg en na mucchia più svelte e c'han più corag de no'? Quant voine fè un fiol el decidne lor. Van a lavrè e chiapne i sold, e se qualcosa en va ben sa 'l marit chiapne i bordei e van a stè per cont lor. Chi l'ha det che l'om ha da essa sempre servit e riverit? Han fat in mod da tiena d'long anca le soc're e a non falle metta el bech tra d'lor. Ma me, me sa che ades en na mucchia più content de no!"
Pian pian tra un discors e cl'atre se fa tardi. Le burdelle se salutne e se dan l'apuntament per el giorne dop.
Van via ognuna per la su strada e me parne sole e avlitte. Me da l'impression che cle or passat insiem, siine stat com un rag de sol tla lor vitta solitaria.
Ciao Burdelle tra poch sarò come vo'.

LE DIFERENS
di Antonio Fontanoni - Sassocorvaro

En m'intend
tant di volatil
mo ho vist
a pasè
'n uc'lìn
pcìn, pcìn
ch'bateva le ale
fitt, fitt
e volava bass
a bals e strapón
com fossa
la su' osession
mentre in alt
c'era 'n uc'lón
ch'bateva le al
ogni tant
Pareva
che 1' facessa
per pasè l temp
Era ma la só
indiferent

SOGN O REALTA'?
di Antonio Fontanoni - Sassocorvaro

Ho insognat
che Urbìn
s'era arbaltat
Né un cop
nè un madon
aveva lasciat
la su' posision
En c'era nisciun
per cle strad
I urbinat
erne a seda
O sdraiat
sotta l'ombra
de Urbìn arbaltat
e guardaven dal bass
i vigol, le piass
i palass
Le punt di campanil
e di turicìn erne le piò vicìn
Qualcun
provava argì a casa
facend le cordat
mo tutt se concludeva
sa dle gran sudat
tra le risat
de chi era sdraiat
Adess ch'me so' sveghiat
me chied:
Urbìn è in pied

L'ORSACHIOTT
di Oliviero Luslini - Urbino

C'è 'n orsachiott
ch'en me fa dormì manca 'na nott.
M'à fatt scopiè tutt le ven,
en c'ho n'ora d'ben.
È achsè sverchj,
che m'apert el coperchj
d'la mi testa tempestosa,
che d'pense mai riposa.
Me tocca alsam de nott
per scriva ti foj rott.
En me sent prò disturbat
perché ho sempre desiderat
da scriva la poesia
prima che scappa via.
El mi ringraziament,
che facc in ste moment,
va ma cl'orsachiott
che m'ispira tutt le nott.

PENICHELLA SOTTA LA CERQUA
(da una vecchia leggenda italiana)
di Stefano Mancini Zanchi -Fermignano

"Enn'è vera che el Padreterne enn' ha fatt manca 'n sbaij quand' ha creat el mond!" pensava 'n cuntadin durant 'na pennichella sotta la cerqua… "Vara machè! Un alber acsè gross, maestos c'ha di frutt' (le ghiand') acsè pcini e l'inguria, invec' ch'c'ha un frutt gross'acsè (e sa le man larghe, sa'l pollicc' e l'indic'aperti, e 'l'rest a pugn, per fe veda la circonferenza del frutt) vien da 'na piantina non più alta d'un metre…!"; e tra 'l sonn' rimurginand tra d'lo ecca ch'al improvis un venticell mov calca foia e na ghianda se stacca dal ram… e i casca tla punta del nas…."boia del diavlacc' porch"!!!! che mal ch'm'ha fatt'!…. pensa se fossa statta l'inguria a caschè da malasò!"….

LUNA D'AGOST
di Stefano Mancini Zanchi -Fermignano

Tutti vrichiat,
com rami de rov,
in t'una nott d' estat,
du' corp se fondne
in preda alla pasiòn, in mezz'an prat.

Intant,
tel ciel,
silensiosa e severa
la luna pallida
'i crea l'atmosfera
sa'l cant d'i grill ti prat
e 'n venticell garbat
che caressa chi corp… inturcinat.

Gonfia com' un palòn
la luna piena
quasi sembra scopiè.
Vria arcontè cla scena
mo en s'pol fè.

Ha litigat sa'l sol
a motiv d'ciò
perché ch'l'arconti enn vol
e lia en se tienn piò!

Com a tant donn, anch' alla luna, sai com'è,
i darìa gust 'na molichina… d'becerè;
E piò i dici sta sitta,
piò vrìa parlè.

Intant…
chi do' amant
sempre piò stretti e inturcinati
proseguen ad amass
indisturbati…

I RICORD CH'VANN IN FUM
di Giuliana Pambianchi - San Marino di Urbino

"Dài mama, ogg t'aiutt i' a bruscè tott cle cartacc…!"
Era già da un po' de giorne che aveva cmincèt a guardè tun chi scatolon tel magazin e a metta via da 'na part tott quel ch'en serviva piò.
C'era ancora tanta robba de quant c'avevèm l'osteria, tott le cart, le fatur, i scontrin…
E già, la "nostra" osteria, l'"Osteria de Minto", el mi nonn, a San Marin d'Urbin, dett anca "Spadon".
L'avem lasceta tel 2002, dop guesi cent'ann d'atività e tre generasion.
Era cnosciutta da totti, sempre pina de gent… I' ce so neta, e anca el mi babo, Tonino. "Tonino de Minto" i dicevne, e anca i' ser "la nipot de Minto" per totti quei che ce cnoscevne. E ce cnosceva parecchia gent, perché erne tanti quei che nivne da no' tl'osteria…
"Dài mama, i guard i' ma ste foch: tocca fè arda tott ben ben, senò è pericolos!"
Dai scatolon ch'aveva svoidet, vien fora un mass de fatur ancora amuchiet; i guard e le slarg, per falle bruscè mei.
E' quelle dla benzina de' Minardi, le più vecch', di prim temp ch' avevem apert el distributor: all'inissi era la Schell, po' c'è statt la Sarom e po' la Mach, e dopp è paset ma l'Agip, che po' a la fin c'ha fatt chiuda el distributor perché diceva ch'era tropp pcin…
De prim c'era sol 'na pompa: da 'na part se deva la benzina e da cl'atra la miscela.
Tla fotografia che c'è de sopra a chesa nostra, c'è el nonn Minto che mett la miscela ma un sa 'n muturin, totti e do' soridenti e ancora giovini.
Riesc a leggia l'ann d'una boletta, mentre la carta va a foc: el 1957, e po' vicin a quella c'né un'antre po' del '60, del '61… Salla marca da boll tacheta da 10 lir…
Cl'atra carta che bruscia, un po' piò in là, è 'na fatura del vin: m'arcord che se cumpreva 5 o 6 damigen per volta dal contadin, un possident che steva de sotta a Fosombron…
Quanti c'n'era de quei d'Urbin che nivne giò da no' a beva el vin bon! Alvaro, Topaceca, Caponi, Sceriffo, Ferdetti, Sveno, Baldelli sa la su' bicicletta, Duilio Santini, Giorgio del Consorsi…
Guard ma'l foc che continua a bruscè cla mocchia de carta, che se consuma e se disfà, e pens che anca de totti lor en c'è armast nisciun, en c'è armast più nient… … Propi come cla carta!
Totta 'na volta vegg t'un foj la firma del nonn: alora corr sobbit archiapè chel pess de carta ch'ha cmincèt a bruscè e el smorc svelt svelt… En li fagg a veda a gì in fum la caligrafia del nonn…!!!
Mama che me sta guardand me dic: "Mo sa fè, l'archiappi invec da bruscialla? Sa ne farè de cla robaccia che en serv piò a nient!"
I' enn i rispond, e, mentre l'arcoj, pens che invec ma me me serv, la voj tienna da cont: me serv, per en fè gì in fum tott i più bei ricord dla mi' giovinessa!

LA MIA DONATELLINA
di Ines Quieti - Urbino

Stamattina ho sognat la mi' Donatellina
C'era la porta aperta, era davanti la cucina
Ce guardam… era sorrident e bella
"Entra entra Donatella"
Al solit educatina
Permesso… s'inchina!
Me sa che niva da malaggiù o dalla su' ma' Maria
Come mai fossa gitta via.
Allora io: "Ce pensi Donatellina,
so' arnutta dall'America sa sta fiolina!"

C'avev 'na fam! Ho pres 'na padlina bassa
Prima la pasta, dop l'acqua
La Donatellina rideva, sta veda ch' s' atacca!

La mi' Donatella rideva fort verament
Come al solit, come gnent!
Che san divertiment !!
Quant te pens !!!
Era vers le nov circa dla matina
E io per daver dormiv tla sdraia tla cucina!

LA FOTOGRAFIA
di Giuseppina Ranocchi - Urbino

La fotografia è l'illusion
de avé fermat
el temp...
ma è sol el ricord
la traccia
de chel moment felic
che armann
più viv
tla nostra memoria

L'OTT DE MARS TUTT A L' ANN
di Stefano Smargiassi - Urbino

Sem machè, è già pasat 'n altr' ann,
non per festegè de qualcun el compleann
mo per 'na data 'na mucchia più important,
anca s' en coincid sa 'l nom d' un sant...
E' l'ott de Mars, dedicat ma tutt le donn
che de ste mond en cert le su' colonn,
per la caparbietà che c' hann in don
en el "gentil sesso" mo sa piò forsa dl' om !
Fann le moi, le madre e le impiegat,
lavorne com le matt anca s' enn disocupat,
se lor se fermen è inuttil avè i calson,
el maschi, da sol, fa la figura del minchion.
E alora valorizamle per quel che fann,
vann ben a venti com' anca a sesant' ann,
en è l'età che c' hann ch' ha da contè,
mo 'l fatt che ognuna d'lor è una e fa per tre !
Facemm pertant in mod che st' ott de Mars
en sia 'na festa soltant d'un giorne scars,
mo sia daver un festeggiament annual
per chi ce consent de viva ben e non stè mal.
Sa tant affett deddich sti pensier ma le present
che fann le vec anca de tutte quelle assent,
e v' asicur che in quest so' sincer fin al midoll:
l'om sensa la donna è com un pagn a moll ...

QUANT SE' BELL, URBIN
di Stefano Smargiassi

Quant se' bell, mi' car Urbin,
dall'alt de chi du' Turicin,
da do' la tu' Aquila Ducal
sa la su' maestosa apertura d'al
domina da secol incontrastata
a perdita d'occh la sotostant valata.
Prò a di' dacsè è com a sminuitt,
te se bell a guardat anca dal piancitt,
pasegiand per la piassa o i vigulin
quand c'è la festa de San Crescentin
do' spossen amirè dietra la procesion,
com dic el dett, le donn cle più belon ...
Sarà che ce so' nat e po' cresciutt,
sarà la famosa crescia fatta sa 'l distrutt,
sarà la tu' aria fina anca d'estat
ch'alevia el cald e fa goda le serat,
mo machè da te se sta ben un sacch
e a lasciat per sempre tocca essa matt.
Sa 'l cel seren, quand splend el sol,
caminand tel centre storric i' m'arcor,
arviv la storia del condotier Fedrich
che sa i su' armament t'aveva fatt ricch
combattend a destra e a manca del Paes,
dov un sacc de bott ha datt e poch n'ha pres .

C'è 'l fascin tua anca sa la nebbia
ch' penetra dentra fin a so ti urecchia,
pasegg e me sembra d'essa da sol,
padron del mond, sensa 'n rumor,
po' all'improvis m'apar el Palass Ducal
e alora dventa 'n moment fatal !
E sa la nev ? Se' 'n spetaccol adiritura,
com un quadre d' Logli du lo te rafigura
mentre te alsi da per terra fin al cel
e de stè machè en sembra quasi ver.
Pró che paura el nevon de quatr'ann fa,
la butava giò a piò non poss, sensa pietà,
el giorne, la sera e po' anca tutt' la nott,
sc' n'era piò de du' metre sopra i copp
e anca io, che l'am da quand er pcin,
pregav ch' arnissa finalment el solarin,
che sa 'l calor scioiessa un po' de ghiacc
e c' facessa arveda n'antre paesagg.

Quanta robba de preg c'hann da visitè
i turista ch' deciden da nì machè da te:
la dimora de quel ch'è dventat Duca,
el su' studiol e 'l quadre sa la Muta,
la casa d'Rafaell el più gran Pitor,
San Gvann e San Giusepp sa i lor tesor,
la Catedral del Dom e la su' Grotta
du en c'è bsogn d'essa 'na bigotta
per armana de stucch e sa 'l fiat cort
tel veda la belessa del Crist mort,
e n'antre po' de chies e d'monument
che fann de te la Capital del Rinasciment.
Per concluda ste viagg emosionant
dentra sta citadina che me piasc tant
voj di' 'na robba ma tutt' la gent,
che me part dal cor e da la ment
e che è la verità, meraviglios Urbin:
te se' unnic, e non sol per i Turicin ...

CHI MUNEI DLA VIA DI ANGELI
(Racconto, poetico)
di Maria Teresa Spaccazocchi - Peglio

Questa, è la vera storia di tre amici inseparabili, che attraversarono la fanciullezza in un luogo davvero inusuale per dei piccoli ragazzi, ma allo stesso tempo misterioso ed affascinante.
Un lungo stradone, ombreggiato da cipressi, detto la via degli Angeli, porta ad un vecchio convento, abbandonato negli anni trenta,"oggi in rifacimento", poi riadattato, intorno gli anni sessanta, ad abitazioni provvisorie per molte famiglie tra cui quelle dei tre ragazzi di cui vi sto raccontando.
La particolarità era "ed è ancor oggi" che il convento affaccia sul grande cimitero del paese, per questo motivo succedeva che; nelle calde notti d'estate, aprendo le finestre delle silenziose e tranquille stanze da letto, i tanti lumini accesi sulle tombe, illuminavano di luce fioca e tremula pareti, soffitti e sogni degli abitanti del convento.

T'arcordi?
chi munei dla via di Angl che giochevne a nascundin,
tra le tomb del cimiter pin de fiori e ricurdin,
le riset a denti stretti tel curtil de chel convent,
tanta gent sotta chi tetti giva avanti anch controvent.
T'arcordi?
gì a piè l'acqua al fontanin salle brocc de rem o d'latta,
gì tel bagn salle galin, ogni giorn era na lotta,
le prim cors in bicicletta so e giò tun chel stradon,
tutt scoreva sensa fretta tun chel buj sensa un lampion,»
la paura !!!! mo de co' !! de gì a chesa sensa luc?..
do l'artrovvi tutt cla pèc e el silensie d'malasò??
S' èn forgieti chi munei sa l'infansia ch'han visut,
en dventeti forti e bej… rispetand quel c'han avut.
Ogg ogniun viv la su' vita, babbi, nonni, pu' enn è fnita,
i ricordi, ma chi ver(!), èn tra i mur del cimiter.
Tel curtil de chel convent gira ancora un sentiment,
l'amicizia quella pura ancor ogg è "com jer era".

L'ESPERIMENT
di Maria Teresa Spaccazocchi - Peglio

Vagh a fè n'esperiment, voj capì, mo i'... chi so' !
me rifug in tun convent, a rifletta... per un po',
chiusa dentra t'na celetta, sensa di manch 'na parola
tutti d'fora c'van de fretta, i' malè… tranquilla... sola,
me sent propi soleveta, tun cla pèc tacch a pensè,
voj capì perché so' nèta, ma ste mond... sa ce sto a fè.

Pensa e arpensa en me vien nient, vota come sta stansetta
se rilassa trop la ment, en li fagh manch a rifletta,
trop silensie fa rumor, venticell che va in tempesta
sent i battiti del cor ch' me rimbomben in tla testa.

En è stat n'idea perfetta, e me cminc a innervusì
dalla calma alla maretta so' paseta per capì.

Tant ancora ho da lotè, per fè quel che voria fè
e per quel che voria dì, in burasca ha da gì a fnì.

Se t'nascondi en servi a gnent, ce se te... soltant per te !!
i', c'voj essa per la gent che ha bsogn anca de me.
So felic d'avè lotet per avè ste stil de vita...
un po' tardi lò capit !!!
aveva da gì... acsè com'è ita.

GADANA D'ESTAT
di Giorgio Speranzini - Ancona

El lavor era già fnitt
er già tutt imbaldansitt
vengh in Urbin ogni ann,
vengh so' per riposam
de sera en vlev restè tla stansa,
so' gitt a rempi' la pansa
tla strada bella dritta c'era scritt
per gì da Toni, volta, en gi' dritt !
Agriturismo Sant'Antoni in t'na casa restaurata
Fa le tajatell, castrat, sugh de papera e crostata
En chieda i passatell
en i trova un vell
trovi invec:

"dla nonna el sugh sa i sapor,
fatt sa del poll j interior "
da la cucina un profum inebriant
che te arcora in un istant
la sfoja fatta in casa da man d'or,
farina, ov e rasagnol
de sensasion … e'...' n discors
che t'arcorden i ann trascors.
La battilarda tla cucina
m'arvien in ment la nonna Albina
tla sala dla magnata ;
in due fann 'na briscolata
sbraiten, imprechen,
fischien e urlen.
A la fin d'ogni partitta
com leggesser 'na carta scritta:
la prima è di bordei
la sconda è de qi bei
la tersa è di qi brutt
la quarta è di cornutt.
Subbit la ment m'arcordava
qel proverbi ch' recitava:
"Fortunato in amor
non giochi a carte".
In tla stalla en c'è 'n cavall,
mo' un bel para de sumarr
Olga e Tommy, vicin a la possa,
somari in carne e ossa

qualcun pol anca pensè
'sa ce farà sa qi sumarr malé
ce farà:
la mortadella ?

AFITT
di Giovanni Volponi
Urbino, sett 2014 – ago 2016

Partend dal soffitt
e a fnì tel cantinon
è tutt un afitt,
è tutt 'na locasion.

Afitta el scantinat
tutt umid e ciancicat
Afitta la mansarda
sa la vecchia battilarda
Afitta el sgabussin
le scope ch'c'erne prima
en dann mica i guadrin!
Afitta el fienil del cuntadin
Afitta le stallucc dle gallin
Afitta la vecchia stalla
sal trav che traballa
Afitta el sottotett
Afitta el gabinett
Afitta du stansett
in fond al tu appartament.
L'ingress indipendent?
Se per lo en è 'n problema, ma me en me fa nient.
Afitta l'antica conduttura
sempre che el chius en te faccia paura
Afitta la ex sagrestia
sa la clausola de recité almen na litania.
Afitta el ballatò
che val anca de piò
perché sensa gambié la destinasion dl'us
è anca discoteca: el dic el nom!
Afitta l'ort, el giardin pensil, el cortil sa 'l steccat
perché en c'è roba piò bella de dormì sotta el ciel stelat.
Afitta el cavalcavia: a Urbin è pien
Volta dla Mort, Balcon dla Vita, via Salvalai,
Voltaccia dla vecchia, le Stalacc, piola san Bartol…
è 'na categoria de tutt rispett: guarden tutti da l'alt in bass!
Afitta el garag, la rimessa, el capanon
Afitta el campanil, la tritta, el balcon.
La casa de campagna, la villa dle Cesan.
Mo sta gent tutti i guadrin, du ch'i metterann?

GRAND HOTEL
di Giovanni Volponi Urbino, sett 2014 – ago 2016

So' stat al Pianell
tun posto da sball:
'n antico castell
vicin a un ruscell.
L'ingress è 'n po' brull
c'enn giust tre betull!
dipint tun cartell:
"UELCOM – GRAND HOTEL" (welcome)
(chi ha scritt chel segnal
en è cert un nobel).
L'intern del local
en è un post banal,
un grande tinell
che funge da oll, (hall)
na scala ad anell
te porta al pian bell
du c'è il ristorant
sa 'l scef a tre stell (chef)
da cusin novel: (nouvelle cuisine)
de prim pappardell
sa ceci e pisell,
second c'è l'agnell,
prosciutt al coltell,
salam, culatell,
fuà gras, ravanell (foie gras)
e crem caramel.
El fior all'occhiell
è la pista da ball
per fé du saltell
de lisc, alli gall
o de tarantell.
Gigin el cantant
è de Mercatell
organett, tamburell
enn Pino e Marcell.
E po' sul più bell
drin drin! Campanell
ariva un burdell
che sping un carell
sa 'na torta a castell,
I flut de cristall (flute)
e spumant tel secchiell.
3, 2, 1… bon ann!
E artacchen i ball.
Insomma, poss dill:
capodanno… strabell!

M'HAN CHIUS EL BUC DEL BUC
Vedi antefatto (*)
di Giovanni Volponi - Urbino, agosto 2016

Durante i lavori di restauro del portico di san Francesco, le impalcature, che hanno chiuso tutto il prospetto verso via Raffaello, hanno lasciato solo una piccola finestrina in corrispondenza del piccolo 'buc del Buc'

Cl'atre giorn niv giò dal mont
(er intent a fè du cont)
quand incontr un conoscent
che me strilla: "Oh, sta attent!
En el vedi che maché
han cminciat a restauré?
Se ve avanti dritt per dritt
fnisci a terra bel gambritt
inciampand t'una cariola
o ti pali del pontegg!"
Era vera: tutt la loggia
dell'ingress de san Francesc
era chius, avvoltolata
da 'na grossa palissata.
I panei de truciolat
limitaven tutt i lat
c'era sol na porticina
dal versant dla piassettina.
I m'affacc de sguaraguai
e intraved du tre operai
al lavor sotta le volt
a pulì cle giravolt
fatt de fiori e de verdura
da 'na crosta de fum scur.
Mentre er nascost malé
un odor vien fin a me:
un profum inebriant,
un aroma assai invitant,
che me fa artorné all'apert
e me guida a pass incert
fin che quand so' guasi in piassa
ste profum pian pian s'abbassa
e de colp m'artorna in ment
il gran gust e 'l godiment
de quand voj la pissa al Buc
e m'la dan da cl'atre buc.
È na roba eccessional,
na corsia preferensial,
en vag piò de sott al banch
en ce pens propri manch:
dal buc del Buc ordin e pagh
e lor me dann el pess piò cald.
Fatto sta che quand me piegh
e già faccio lo spavald,
una brutta sensasion
me pervad, e un gran magon
me vien so quand ho capit
che i ponteggi m'han tradit.
Era offlimmit tutt el lat
tutto chiuso el porticat.
E 'l mi caro buganin,
attravers un finestrin,
se vedeva in lontanansa
a più d'un metre de distansa.
Tra 'l pertug nel truciolat
e 'l mi buc dimenticat
c'era almen un metr e mess
sa le impalcatur tra mess.
Ho infilat el bracc per lung
"En c'arriv, en el raggiug!".
C'er rimast propri de stucc:
"M'hanno chius el buc del Buc!"
Ripetevo sconsolat
ai passant scandalissat
che dicevne " 'N altre matt?
De quei solit fors è pegg:
batt i pugni tel pontegg,
ste dimena com un gatt,
urla e c'ha na logorrea…
en se pol porté a Varea?"
Mentre prov a repliché
"Matto schianto saré te!"
Un'idea me vien in ment
per ovvié all'inconvenient.
Ved de sguinc tra le lamier
un'addetta del cantier.
I facc: "Scusi signorina,
se un moment me s'avvicina
me pó fé la cortesia
de fé da collegament
sa ste buc dla pisseria
che m'han chius sensa dì nient?"
Lei collega il Buc sa me e,
vista l'ora de pransé,
fa na pausa dal lavor,
chiappa un trancio sa'l pundor,
e alla faccia del cantier
ce magnam la pissa insiem.

(*) El buc del Bug. Poesia di G. Volponi già pubblicata come segnalata in V'l'arcont in dialett X vol. ecco qui di seguito il testo:

Un bel giorn niv gió dal Mont
(tutt intent a fè du cont)
quand incontr un conoscent
che me fa: "Du vé? Sta attent !
Se ve avanti de ste pass
ve gió dritt tun chel tombin !
Tien un po' el volum pió bass
de cl'aippodd, de chel ciaftin!"
Lo me strappa el mi' majon
evitand un cascaton
ma fortuna ch' c'era ló
s'no giv gió e en amiv pió só.

Tun second un odorin
vien al nas... è rosmarin !
Da do' scappa, da do' esc?
sarà mica un prans de pesc?
Ecch, difatti sent el tonn...
sa le cpoll è anca pió bon;
el pundor, la mosarella:

'i magnaria a stroppacerquella.
E po', dop i tufiron,
melansan e peperon,
sent el fritt dle patatin
sa le oliv e le succhin.
Ma tutt ste popò de robba
(ch'è l'contrari de 'na sbobba)
da 'na part sarà scappat
se 'l cervell en l'ha inventat
E difatti facc un pass
e m'accorg che quatre sass
èn cornic d'un finestrin
da do' niva st'odorin.
Spost el naso vers ste buc
e sa ved? Ma è 'l buc del Buc!
En ce pens manca un istant:
m' ne facc dè un pess bel croccant
e ansiché entrè dentra el Buc
prend e pagh da st'altre buc.

LE CHIACCHIERE DLA GENT
di Zanchi Franco - Urbino

Insomma Crist è mort dal fredd
era o no el padron dle legn^
Quant sciapat ho sentit
Ormai ho pers l'udit!
Ogni giorn 'na cavolata
Ogni giorn 'na sciapata
Sta gent parla sparla ma en sa gnent
È in preda all'esauriment !
Adess ve voj fè content
En v'ascolt più per gnent! !
Sti chiacchieroni ormai en tanti.

URBIN
di Maria Grazia Zanchi - Monte Cerignone

Te pens un casin
da distant, i piant !
Me so' sposata, en so' fugitta
purtropp me so' pentitta.
Te vengh sempre a trovè
perchè en vieni via sa me?
Quant cala el sol me crepa el cor !
Accend el motor me sent smarritta
sband anca tla dritta
magari guid sa 'na mana e sa claltra asciugh la lacrima sfugitta!
Che tristessa, ma che destin
Ciao ciao a presto Urbin !
I piant, i ricord: un strascin !
Insomma basta da piagna porca putana!
tl' incroc so' arnutta vers Urbin !
Ho sbajat anca la strada !